Ապրիլի 3-ին իրականացվեց հերթական մոնիթորինգային այցը Լոռու մարզում գործող ՄԱՎԵՏԱ ծրագրի գործընկեր ֆերմերային տնտեսություններ՝ գնահատելու դուալ կրթության շրջանակում աշկերտների՝ գործատուի մոտ իրականացվող ուսուցման արդյունավետությունն ու գործնական ներգրավվածությունը։

Այցի հնարավորություն ընձեռեց տեղում դիտարկելու, թե ինչպես է տեսական գիտելիքը վերածվում գործնական հմտությունների՝ իրական աշխատանքային միջավայրում։ Աշկերտները ակտիվորեն մասնակցում էին հողի նախապատրաստման և ցանքսի գործընթացներին՝ կիրառելով սերմացուի ընտրության, հողի մշակման և պարարտանյութերի օգտագործման վերաբերյալ իրենց ձեռք բերած գիտելիքները։

Կարևոր ձեռքբերում է այն, որ մոդուլային ուսուցմամբ նախատեսված առաջադրանքներից բացի, աշկերտները ներգրավված են նաև ֆերմայի առօրյա աշխատանքներում՝ ստանձնելով լրացուցիչ պարտականություններ և աջակցելով տարբեր գյուղատնտեսական գործընթացներում։ Այս մոտեցումը զգալիորեն նպաստում է նրանց գործնական փորձի խորացմանը, պատասխանատվության զգացման ձևավորմանը և աշխատաշուկայի պահանջներին համապատասխան պատրաստվածության բարձրացմանը։

ՄԱՎԵՏԱ ծրագրի շրջանակում իրականացվող նման այցերը կարևոր դեր ունեն գործընթացի շարունակական վերահսկման և որակի ապահովման գործում՝ ապահովելով, որ դուալ կրթության իրականացումը համապատասխանի սահմանված չափանիշներին և չշեղվի նախատեսված ուղղությունից։

Գեղարքունիքի մարզի Ճամբարակ և Վարդենիս համայնքներում իրականացվեց հանդիպում-քննարկում՝ ուղղված Արցախից բռնի տեղահանվածների և հյուրընկալող բնակչության միջև համագործակցության խթանմանը և համատեղ եկամուտ ստեղծող գործունեությունների զարգացմանը։

Կերարտադրության աջակցության շրջանակում ծրագրի շահառուներին տրամադրվել են անհրաժեշտ միջոցներ՝ գարի, կորնգան, ազոտական պարարտանյութ և դիզելային վառելիք՝ նպատակ ունենալով խթանել համատեղ հողի մշակումը և ապահովել կայուն եկամտի ձևավորում։

Հանդիպման ընթացքում ներկայացվեցին տրամադրված նյութերի արդյունավետ և նպատակային օգտագործման մոտեցումները, քննարկվեցին գործնական հարցեր և փոխանակվեց փորձ՝ նպաստելով ծրագրի առավել արդյունավետ իրականացմանը։

Նախատեսվում է նմանատիպ հանդիպումների իրականացում նաև Սյունիքի մարզում՝ ընդլայնելով ծրագրի ազդեցությունն ու ապահովելով առավել ընդգրկուն աջակցություն համայնքներին։

Այս նախաձեռնությունները նպաստում են սոցիալական համախմբման ամրապնդմանը, տնտեսական ակտիվության բարձրացմանը և համայնքների կայուն զարգացմանը:

SEIRA ծրագիրը ֆինանսավորվում է Շվեյցարիայի զարգացման և համագործակցության գործակալության կողմից և իրականացվում է «Ռազմավարական զարգացման գործակալություն» ՀԿ-ի և ՄԱԿ-ի Պարենի համաշխարհային ծրագրի կողմից։