Սույն թվականի նոյեմբերի 29-30-ին “Ռազմավարական զարգացման գործակալություն” ՀԿ-ի կողմից իրականացվող «Հայաստանում գյուղատնտեսության ոլորտում մասնագիտական կրթության և ուսուցման արդիականացում» (MAVETA) ծրագրի շրջանակներում տեղի ունեցավ ծրագրի գործընկեր քոլեջների դասախոսների և ուսանողների փորձի փոխանակման այց ՀԱԱՀ Սիսիանի մասնաճյուղ և Սիս-Ալպ կաթնարդյունաբերական ձեռնարկություն:

Այցի առաջին մասը կազմված էր տեսական և գործնական դասընթացներից, որտեղ մասնակիցները ինտերակտիվ եղանակով ծանոթացան լավորակ կաթի ստացման գործընթացին և ՀԱԱՀ լաբորատորիայում պատրաստեցին սուլուգունի պանիր, ծանոթացան պանրի պատրաստման տեխնոլոգիային, կատարեցին փորձերի ցուցադրումներ, և համտեսեցին պատրաստված պանիրը:

Քոլեջի կողմից ներկայացվեց նաև տարբեր ոլորտներում պրակտիկայի կազմակերպման հաջողված փորձը։

Սիս-Ալպ կաթնամթերքի արտադրական ձեռնարկություն այցի ընթացքում մասնակիցներին ներկայացվեց կաթի ընդունումից մինչև պատրաստի արտադրանքի  ստացման տեխնոլոգիական գործընթացները և պանրի ու այլ տեսակի կաթնամթերքի արտադրության առանձնահատկությունները:

ՀԱԱՀ Սիսիանի մասնաճյուղի խելացի գյուղատնտեսության կենտրոնում մասնակիցները ծանոթացան ջերմատնային տնտեսության, այգեգործության, անասնապահության, կերարտադրության ենթակառուցվածքներին, որտեղ ներդրված են ինտենսիվ, արդի և նորարար մոտեցումներով ու տեխնոլոգիաներով գյուղատնտեսության վարման մեթոդներ: Ներկայացվեց կենտրոնի կարևորությունը գործնական դասընթացների իրականացման համար:

Մասնակիցները կարևորեցին նմանատիպ փորձի փոխանակման այցերի նշանակությունը` գիտելիքի կատարելագործման տեսանկյունից:

2023 թվականի նոյեմբերի 28-ին «Ռազմավարական զարգացման գործակալություն» ՀԿ-ի կողմից իրականացվող «RECONOMY» տարածաշրջանային ծրագրի «Ոլորտների թվայնացում հանուն մրցունակության» նախագծի շրջանակներում կազմակերպվել է առցանց հանդիպում-քննարկում «Ագրոնեկտ» ընկերության (Վրաստան) և Հայաստանի և Մոլդովայի առաջատար գյուղատնտեսական ընկերությունների և մասնագիտական ասոցիացիաների միջև:

Հանդիպման նպատակն էր ներկայացնել «Ագրոնեկտ» թվային հարթակը ԱլԳ երկրներում պոտենցիալ շահագրգիռ գործընկերներին, բացահայտել հետաքրքրություններն ու հետագա համագործակցության համար հնարավոր քայլերը։

«Ագրոնեկտ» -ը գյուղատնտեսական փորձագիտական թվային հարթակ է, որտեղ ֆերները կարող են խորհրդատվություն ստանալ աշխարհի լավագույն գյուղատնտեսների կողմից: Մի կողմից հարթակը ֆերմերների համար հասանելի է դարձնում գյուղատնտեսության ոլորտի բարձրակարգ մասնագետների խորհրդատվական ծառայությունները, իսկ մյուս կողմից՝ թույլ է տալիս փորձագետներին լրացուցիչ եկամուտ ստանալ՝ կիրառելով իրենց գիտելիքները: Իր մեկնարկից ի վեր «Ագրոնեկտ»-ն արդեն իսկ ներգրավել է իր հարթակում 10 տարբեր երկրների ֆերմերների և փորձագետ-խորհրդատուների և նախատեսում է հետագա ընդլայնում:

RECONOMY-ը Շվեդիայի միջազգային զարգացման համագործակցության գործակալության (Sida) տարածաշրջանային ներառական և կանաչ տնտեսական զարգացման ծրագիր է, որն իրականացվում է HELVETAS Swiss Intercooperation-ի կողմից՝ «Ռազմավարական զարգացման գործակալություն» ՀԿ-ի և Արևելյան Գործընկերության և Արևմտյան Բալկանների տարածաշրջաններում այլ կազմակերպությունների հետ համագործակցությամբ: