20 Aug
Uncategorized

SEIRA Իրազեկվածությունը սոցիալ-տնտեսական ինտեգրման կարևոր նախապայմաններից է

Աջակցության հնարավորությունները կարող են արդյունավետ լինել միայն այն դեպքում, երբ մարդիկ գիտեն դրանց մասին, հասկանում են՝ ինչ հնարավորություններ են իրենց հասանելի, և կարողանում են կողմնորոշվել դրանցից օգտվելու հարցում։
Գեղարքունիքի մարզում՝ Վարդենիսում և Ճամբարակում, «Փախստականների սոցիալ-տնտեսական ինտեգրումը Հայաստանում» (SEIRA) ծրագրի շրջանակում կազմակերպվել են իրազեկման հանդիպումներ Լեռնային Ղարաբաղից բռնի տեղահանված անձանց համար։
Հանդիպումների ընթացքում ներկայացվել են պետական աջակցության ծրագրերը, ինչպես նաև Միասնական սոցիալական ծառայության կողմից Լեռնային Ղարաբաղից բռնի տեղահանված անձանց համար իրականացվող նախաձեռնությունները։
Միաժամանակ, նման ձևաչափերը կարևոր են նաև այն պատճառով, որ տեղեկատվության փոխանցումը դառնում է երկկողմանի գործընթաց․ շահառուների հարցերն ու փորձառությունը հնարավորություն են տալիս ավելի լավ հասկանալու, թե որտեղ են առաջանում տեղեկատվական կամ գործնական խոչընդոտներ պետական աջակցության ծրագրերից օգտվելիս։
Արդյունքում, իրազեկման հանդիպումները նպաստում են, որպեսզի արդեն իսկ առկա աջակցության գործիքները ավելի հասանելի և կիրառելի դառնան մարդկանց համար՝ ամրապնդելով սոցիալ-տնտեսական ինտեգրման գործընթացը համայնքային մակարդակում։
SEIRA ծրագիրը ֆինանսավորվում է Շվեյցարիայի զարգացման և համագործակցության գործակալության կողմից և իրականացվում է «Ռազմավարական զարգացման գործակալություն» ՀԿ-ի և ՄԱԿ-ի Պարենի համաշխարհային ծրագրի կողմից։
13 Aug
NEWSARM, NEWSARM, NEWSARM, NEWSARM, NEWSARM

INLIMA Որտեղ են անցնում նախրաքաշի ուղիները․ քարտեզագրման աշխատանքներ Սյունիքում

Երբ խոսում ենք արդյունավետ անասնապահության մասին, նախրաքաշի ուղին պարզապես ֆիզիկական ճանապարհ չէ։ Այն կենդանիների տեղաշարժի անվտանգությունը, ֆերմերների աշխատանքի արդյունավետությունը, արոտավայրերի հասանելիությունն ու համայնքային ռեսուրսների երկարաժամկետ կառավարումն իրար կապող համակարգ է։

INLIMA ծրագրի շրջանակում Սյունիքի մարզի Սիսիան և Գորիս խոշորացված համայնքներում իրականացվել են աշխատանքային հանդիպումներ համայնքային կառավարման և գյուղատնտեսության ոլորտի պատասխանատուների հետ՝ ներկայումս ֆերմերների կողմից օգտագործվող նախրաքաշի ուղիների ուսումնասիրության և քարտեզագրման աշխատանքների ընթացքը ներկայացնելու և համայնքային տեսլականի հետ համադրելու նպատակով։

Հանդիպումների ընթացքում ներկայացվել են նախրաքաշի նախնական երթուղիները, քննարկվել են ենթակառուցվածքների հնարավոր տեղադիրքերը, ինչպես նաև համայնքների կողմից առաջարկվող առաջնահերթությունները։ Առանձնահատուկ ուշադրություն է դարձվել այն հարցին, թե որքանով են առաջարկվող երթուղիները համապատասխանում համայնքի իրական կարիքներին, առկա ենթակառուցվածքներին և ֆերմերների կողմից ձևավորված գործնական պահանջներին։

Այս գործընթացի կարևորագույն սկզբունքը պարզ է՝ քարտեզը պետք է արտացոլի ոչ միայն տարածքը, այլև այն օգտագործող մարդկանց իրական կարիքները։

Այդ նպատակով նախագծող մասնագետի կողմից իրականացված նախնական քարտեզագրման արդյունքները կներկայացվեն Գորիսի և Սիսիանի համայնքապետարաններին՝ համայնքային մասնագետների դիտարկումները, առաջարկներն ու անհրաժեշտ փոփոխությունները ներառելու համար։ Համայնքային հետադարձ կապի հիման վրա քարտեզագրման վերջնական փաստաթուղթը կլրամշակվի և կշրջանառվի համապատասխան համայնքներում։

Միաժամանակ, INLIMA-ի շրջանակում հանդիպումներ են անցկացվել նաև կաթի և մսի արժեշղթայի դերակատարների՝ կաթ վերամշակող կազմակերպությունների և սպանդանոցների ներկայացուցիչների հետ։ Այցերի ընթացքում ուսումնասիրվել են գործող ենթակառուցվածքները և քննարկվել հնարավոր համագործակցության ուղղությունները։

Այսպիսով, աշխատանքը կառուցվում է մեկ փոխկապակցված տրամաբանությամբ՝ գյուղատնտեսական ենթակառուցվածք → համայնքային պլանավորում → արժեշղթայի զարգացում → ֆերմերի համար ավելի արդյունավետ և կայուն անասնապահություն։

«Նորարարական անասնապահություն․ կենդանիների նախրաքաշ, բուծում և շուկաներ» (INLIMA) ծրագիրն իրականացվում է «Ռազմավարական զարգացման գործակալություն» ՀԿ-ի կողմից՝ Ավստրիական զարգացման և համագործակցության ծրագրային միավոր Ավստրիական զարգացման գործակալության ֆինանսավորմամբ:

12 Aug
Uncategorized

ՄԱՎԵՏԱ Երիտասարդության միջազգային օրը Նոյեմբերյանի պետական քոլեջում երիտասարդները ծանոթացան «Սառնարանային տնտեսություն» մասնագիտությանը

Օգոստոսի 12-ին՝ Երիտասարդության միջազգային օրը, երիտասարդները Նոյեմբերյանի պետական քոլեջում բացահայտեցին «Սառնարանային տնտեսություն» մասնագիտությունը՝ որպես ժամանակակից, տեխնոլոգիական, պահանջված և բարձր վարձատրվող մասնագիտություն։

Միջոցառումն անցկացվեց ՀՀ շրջակա միջավայրի նախարարության և ՄԱԿ-ի արդյունաբերական զարգացման կազմակերպության՝ UNIDO-ի կողմից համատեղ իրականացվող «Օզոնային շերտի պահպանություն» ծրագրի շրջանակում։

Երիտասարդները ծանոթացան սառնարանային տնտեսության ոլորտի առանձնահատկություններին, ժամանակակից տեխնոլոգիաներին, մասնագիտության պահանջարկին և կարիերայի հնարավորություններին։

Այս մասնագիտության զարգացման գործում իր կարևոր դերն ունի նաև ՄԱՎԵՏԱ ծրագիր։

«Հայաստանում գյուղատնտեսության մասնագիտական կրթության և ուսուցման արդիականացում»՝ ՄԱՎԵՏԱ II ծրագրի շրջանակում «Սառնարանային տնտեսություն» մասնագիտությունը Նոյեմբերյանի պետական քոլեջում իրականացվելու է դուալ կրթության ձևաչափով։

Այսպիսով, ուսանողները մասնագիտական գիտելիքները ձեռք են բերելու ոչ միայն քոլեջում, այլև իրական աշխատանքային միջավայրում՝ համատեղելով տեսական ուսուցումն ու գործնական փորձը։

Սառնարանային տնտեսությունը պարզապես մասնագիտություն չէ․ այն ոլորտ է, որտեղ տեխնիկական գիտելիքը վերածվում է պահանջված մասնագիտության և աշխատանքի հնարավորության։

Երիտասարդների ապագան սկսվում է այն մասնագիտություններից, որոնք պետք են արդեն այսօր։

ՄԱՎԵՏԱ ծրագիրը ֆինանսավորվում է Գերմանիայի տնտեսական համագործակցության և զարգացման նախարարության (BMZ), Շվեյցարիայի զարգացման և համագործակցության գործակալության (SDC), Ավստրիական զարգացման գործակալության (ADA) և Հայաստանի կառավարության կողմից։

Ծրագիրն իրականացնող գործընկերներն են Գերմանական միջազգային համագործակցության ընկերությունը (GIZ), Ռազմավարական զարգացման գործակալությունը և Բեռնի կիրառական գիտությունների համալսարանի (HAFL) գյուղատնտեսական, անտառային և պարենային գիտությունների դպրոցը:

10 Aug
Uncategorized

INLIMA Եկամտաբեր անասնապահության հիմքում ընկած է կենդանիների արհեստական սերմնավորումը

Ինչպե՞ս կարող է արհեստական սերմնավորումը նպաստել տնտեսության արտադրողականության և եկամտաբերության բարձրացմանը։ Հենց այս հարցի շուրջ էր INLIMA ծրագրի շրջանակում Սևանում և Ծաղկահովիտում իրականացված իրազեկման այցերի հիմնական ուղերձը։

Հանդիպումների ընթացքում անասնապահներին ներկայացրինք խոշոր եղջերավոր կենդանիների (ԽԵԿ) արհեստական սերմնավորման պետական սուբսիդավորման հնարավորությունը՝ որպես իրենց տնտեսությունների արտադրողականությունն ու եկամտաբերությունը բարձրացնելու գործնական գործիք։

Արհեստական սերմնավորումը պարզապես վերարտադրության տեխնոլոգիա չէ։ Այն հնարավորություն է տալիս բարելավել կենդանիների տոհմային արժեքը, ստանալ ավելի բարձր մթերատվությամբ կենդանիներ, նվազեցնել անպտղության ռիսկը, պլանավորել կաթնատվության շրջանը և բացառել մոտ ազգակցական բուծումը։ Միաժամանակ, այն կարող է նպաստել որոշ վարակիչ հիվանդությունների փոխանցման կանխմանը և տնտեսության ծախսերի արդյունավետ կառավարմանը։

Հանդիպումների ընթացքում ֆերմերներին ներկայացվեցին նաև ծրագրի շրջանակում հասանելի բարձրորակ ցեղային ընտրանքները՝ Հոլշտին, Շվից, Ջերսեյ և Ֆլեքվի, որպեսզի բուծման որոշումները հնարավոր լինի կապել կոնկրետ տնտեսության արտադրական նպատակների հետ։

Իսկ պետական աջակցության մեխանիզմը այս ծառայությունը դարձնում է ավելի հասանելի․ ծրագրով մեկ կենդանու սերմնավորման արժեքից 10,000 դրամը փոխհատուցվում է պետության կողմից, իսկ 5,000 դրամը վճարում է անասնապահը։ Ծրագրից կարող են օգտվել թիրախային մարզերի բնակավայրերում բնակվող այն տնտեսվարողները, որոնք ունեն սերմնավորման ենթակա մինչև 20 գլուխ համարակալված և իրենց անունով հաշվառված ԽԵԿ և պայմանագիր են կնքում պետական աջակցության ծրագրին մասնակցող ԱՍ տեխնիկի հետ։

Սակայն արդյունավետ բուծումը սկսվում է ավելի վաղ՝ կենդանու առողջության և պատշաճ պահվածքի ապահովումից։ Պատշաճ կերակրումը, ջրումը, պատվաստումները, մակաբույծների դեմ պայքարը, անասնաշենքի պայմաններն ու հիգիենան այն գործոններն են, որոնք ուղղակիորեն ազդում են կենդանու վերարտադրողական և արտադրական ներուժի վրա։

INLIMA-ի այս արշավի միջոցով պետական աջակցության հնարավորությունները ներկայացվում են ոչ միայն որպես հասանելի ծառայություն, այլև որպես գիտելիքահեն բուծման գործիք՝ անասնապահներին հնարավորություն տալով ավելի հիմնավորված որոշումներ կայացնել և բարձրացնել իրենց տնտեսությունների արտադրողական ու տնտեսական ներուժը։

«Նորարարական անասնապահություն․ կենդանիների նախրաքաշ, բուծում և շուկաներ» (INLIMA) ծրագիրն իրականացվում է «Ռազմավարական զարգացման գործակալություն» ՀԿ-ի կողմից՝ Ավստրիական զարգացման և համագործակցության ծրագրային միավոր Ավստրիական զարգացման գործակալության ֆինանսավորմամբ:

03 Aug
Uncategorized

IADAAM Քննարկվեցին հողերի միավորման գործընթացի ներդրման հնարավորությունները Հայաստանում

Ոռոգվող գյուղատնտեսության արդիականացումը պահանջում է ոչ միայն ենթակառուցվածքների զարգացում, այլև հողային ռեսուրսների կառավարման նոր մոտեցումներ:

Գյուղատնտեսական նշանակության հողերի մասնատվածությունը շարունակում է մնալ Հայաստանի գյուղատնտեսության զարգացման առանցքային մարտահրավերներից մեկը՝ սահմանափակելով արտադրողականության աճը, ժամանակակից տեխնոլոգիաների կիրառումը, ոռոգման համակարգերի արդյունավետ կառավարումը և ոլորտի մրցունակության բարձրացումը։

Այս համատեքստում ՀՀ էկոնոմիկայի նախարարությունում կայացավ «Հողերի միավորման գործընթացի ներկայացում» խորագրով հանդիպում-քննարկումը, որի ընթացքում նախարարության մասնագետներին ներկայացվեցին հողերի միավորման (կոնսոլիդացիայի) գործընթացի ռազմավարական նշանակությունը, միջազգային և եվրոպական փորձը, ինչպես նաև դրա կիրառելիության հնարավորությունները Հայաստանի պայմաններում։

Քննարկման շրջանակում անդրադարձ կատարվեց գյուղատնտեսական նշանակության հողերի մասնատվածության հետևանքով առաջացող մարտահրավերներին, հողերի միավորման տարբեր մոդելներին, Արարատի և Արմավիրի մարզերում նախատեսվող պիլոտային մոտեցումներին, ինչպես նաև գործընթացի ինստիտուցիոնալ, իրավական և կազմակերպական հիմքերի զարգացմանը։

Հողերի միավորումը ժամանակակից հողային քաղաքականության կարևոր գործիք է, որն ուղղված է հողային ռեսուրսների առավել արդյունավետ կառավարմանը, գյուղատնտեսական արտադրության արտադրողականության բարձրացմանը, արտադրական ծախսերի կրճատմանը, ոռոգման համակարգերի արդյունավետ օգտագործմանը և գյուղատնտեսության մրցունակության ամրապնդմանը։

Հենց այս համատեքստում հանդիպումը կարևոր հնարավորություն էր միջազգային փորձի ներկայացման, մասնագիտական երկխոսության և Հայաստանի պայմաններում հողերի միավորման գործընթացի ներդրման ու առաջխաղացման հնարավորությունների քննարկման համար։

«Հայաստան – Ոռոգվող գյուղատնտեսության զարգացումը Արարատի և Արմավիրի մարզերում» (IADAAM) ծրագիրը, որը ֆինանսավորվում է Եվրոպական միության կողմից (ԵՄ) և իրականացվում Զարգացման ֆրանսիական գործակալության (ԶՖԳ) աջակցությամբ, նպատակ ունի վերափոխել ոռոգվող գյուղատնտեսությունը Հայաստանում։

ՀՀ էկոնոմիկայի նախարարության կողմից իրականացվող ծրագրի տեխնիկական աջակցության բաղադրիչն իրականացվում է «Ագրո քընսալթինգ Եվրոփ»-ի, «Ավենյու քընսալթինգ գրուպ»-ի, «Ռազմավարական զարգացման գործակալություն» ՀԿ-ի և «3 ԱՐ Ստրատեգիա» ՍՊԸ մասնակցությամբ կոնսորցիումի կողմից՝ գյուղատնտեսական քաղաքականության ամրապնդման և ոլորտային բարեփոխումների առաջխաղացման նպատակով:

123›»