INLIMA Ժամանակակից անասնաբուծությունը սկսվում է գիտելիքից, տեխնոլոգիայից և ճիշտ կառավարվող վերարտադրությունից
INLIMA ծրագրի շրջանակում՝ կենդանիների արհեստական սերմնավորման վերաբերյալ իրազեկման նախաձեռնության ներքո, անցկացվեց «Նիդերլանդների փորձը տավարաբուծության և ԽԵԿ-ի վերարտադրողականության կառավարման գործում» թեմայով մասնագիտական դասընթացը։
Դասընթացը հարթակ էր, որտեղ գիտությունը, միջազգային փորձը և դաշտային պրակտիկան հանդիպեցին մեկ լսարանում։
Մասնակիցների թվում էին՝
Հայաստանի ազգային ագրարային համալսարանի անասնաբուժության մասնագիտության ուսանողները, «ՄԱՎԵՏԱ» ծրագրի աշկերտները՝ Ա. Քոչինյանի անվան քոլեջի անասնաբուժության մասնագիտությունից, Անասնաբույժների ազգային ասոցիացիայի ներկայացուցիչները, ՀԱԱՀ պրոֆեսորադասախոսական կազմը, և հատկապես կարևոր՝ գործող կին անասնաբույժները, ովքեր իրենց ամենօրյա աշխատանքում անմիջականորեն կիրառում են ոլորտի գիտելիքն ու փորձը։PUM-ի փորձագետ Dr. Jan Muskens-ի կողմից անցկացված դասընթացը ներկայացրեց Նիդերլանդներում կիրառվող մոտեցումները՝ տավարաբուծության կառավարման, ժամանակակից տեխնոլոգիաների կիրառման, գիտության և գործնական աշխատանքի համադրման, անասնաբուժական ծառայությունների, ինչպես նաև հիվանդությունների կանխարգելման և բուժման ուղղություններով։
Սակայն նման դասընթացների արժեքը միայն նոր գիտելիք ստանալը չէ։ Այն նաև փորձի փոխանցման շղթա է՝ ապագա մասնագետներից մինչև ոլորտում այսօր աշխատող անասնաբույժներ, որը կարող է նպաստել ավելի արդյունավետ, տեխնոլոգիապես զարգացած և եկամտաբեր անասնապահության ձևավորմանը Հայաստանում։
Գիտելիքը փոխանցվում է։ Փորձը կիրառվում է։ Իսկ փոփոխությունը սկսվում է հենց այստեղ
«Նորարարական անասնապահություն․ կենդանիների նախրաքաշ, բուծում և շուկաներ» (INLIMA) ծրագիրն իրականացվում է «Ռազմավարական զարգացման գործակալություն» ՀԿ-ի կողմից՝ Ավստրիական զարգացման և համագործակցության ծրագրային միավոր Ավստրիական զարգացման գործակալության ֆինանսավորմամբ:
