Ապրիլի 30-ին տեղի է ունեցել «ՀՀ բնական կերհանդակների՝ արոտավայրերի և խոտհարքների կայուն կառավարմանն ուղղված ծրագրերի համակարգման հարթակ[1]»-ի  չորրորդ աշխատաժողովը, որին մասնակցում էին նաև  ՀՀ գյուղատնտեսության, տարածքային կառավարման և զարգացման, ինչպես նաև բնապահպանության նախարարությունների, ոլորտում գործող միջազգային, հասարակական և գիտական հաստատությունների ներկայացուցիչներ:

Աշխատաժողովի ընթացքում ներկայացվել է հարթակի նոր գործընկեր կազմակերպությունը, քննարկվել են ՀՀ բնական կերհանդակների` արոտավայրերի և խոտհարքների կայուն կառավարման հայեցակարգի մշակման, խնդիրների գույքագրման և վերլուծության ուղղությամբ կատարված աշխատանքները, հիմք է դրվել հայեցակարգի մշակման համար անհրաժեշտ աշխատանքային խմբի ձևավորմանը։ Անդրադարձ է կատարվել նաև մարզպետարանների և համայնքների ներկայացուցիչների կողմից հնչեցված արոտների երկզոնային կառավարմանը խոչընդոտող խնդիրներին, ինչպես նաև ներկայացվել են դրանց հաղթահարմանն ուղղված անհրաժեշտ միջոցառումները:

________________________________________

[1]Հարթակը հանդիսանում է «Ռազմավարական զարգացման գործակալության» ՀԿ-ի, Գերմանիայի միջազգային համագործակցության ընկերության աջակցությամբ իրականացվող «Կենսաբազմազանության ինտեգրված կառավարումը Հարավային Կովկասում» ծրագրի և Համաշխարհային բանկի աջակցմամբ իրականացվող CARMAC II ծրագրի համատեղ նախաձեռնություն:

«ՄԿՈւ զարգացում Սյունիքի մարզում» ծրագրի շրջանակներում մարտի 28-29, 2019թ. Աղվերանի Կրիստալ Ռեզորթ հյուրանոցում տեղի ունեցավ «Կրտսեր անասնաբույժ» մասնագիտության ուսումնառության նյութերի ներկայացում/քննարկում: Քննարկմանը մասնակցեցին ՀՀ կրթության և գիտության նախարարության (ԿԳՆ) և Մասնագիտական կրթության և ուսուցման զարգացման ազգային կենտրոնի (ՄԿՈՒԶԱԿ) ներկայացուցիչները, Գորիսի պետական գյուղատնտեսական քոլեջի, Ստեփանավանի պետական գյուղատնտեսական քոլեջի, Գավառի պետական գյուղատնտեսական քոլեջի դասախոսները, մասնավոր անասնաբուժությամբ զբաղվող մասնագետները, Անասնաբույժների ազգային ասոցիացիա հասարակական կազմակերպության ներկայացուցիչներ: Հանդիպման նպատակն էր ներկայացնել “Կրտսեր անասնաբույժ” մասնագիտության հատուկ մասնագիտական 9 մոդուլների համար մշակված նյութերը: Հանդիպման սկզբին ողջույնի խոսքով հանդես եկան ՀՀ ԿԳՆ նախնական և միջին մասնագիտական կրթության վարչության պետ` պրն. Արտակ Աղբալյանը և«ՄԿՈՒ զարգացում Սյունիքի մարզում» ծրագրի ղեկավար` Լիլիթ Հովհաննիսյանը: Այնուհետև ծրագրի փորձագետ Մերուժան Զադայանը ներկայացրեց Կրտսեր անասնաբույժ մասնագիտության կրթական չափորոշիչը և մոդուլային ծրագիրը, որոնց հիման վրա մշակվել են ուսումնառության նյութերը: Փորձագետի կողմից ներկայացվեց հիմնական մոտեցումը, որը օգտագործվել էր նյութերի մշակման ընթացքում: Յուրաքանչյուր մոդուլին վերաբերվող նյութ պարունակում է նկարագրողական մաս, ուսամնառության արդյունքները, գործնական վարժություններ և գիտելիքները ստուգելու համար թեսթեր: Յուրաքանչյուր նյութից հետո ներկայացված են նաև օգտագործված գրականության ցանկը և համապատասխան հղումները: Ներկայացումից հետո մասնակիցները հնարավորություն ունեցան քննարկել նյութերը, տալ հարցեր և ներկայացնել դիտարկումներ և առաջարկներ: Հանդիպման 2-րդ օրը մասնակիցները շարունակեցին քննարկել մշակված նյութերը և ամփոփեցին առաջարկները:

Մասնագետների կողմից ներկայացված առաջարկները և նկատառումները հաշվի կառնվեն փորձագետի կողմից նյութերը վերջնականացնելու ընթացքում: Հանդիպման ավարտին մասնակիցները հայտնեցին իրենց գոհունակությունը և նշեցին, որ մշակված նյութերը բավականին մատչելի են և դասախոսների և ուսանողների համար: