Ս. թ․ ապրիլի 26-ին Շիրակի մարզում և ապրիլի 23-ին Սյունիքի մարզում «Ռազմավարական զարգացման գործակալություն» ՀԿ-ի և ՀՀ ՍԱՏՄ համատեղ ջանքերով կազմակերպվեցին անասնաբույժի օրվանը նվիրված՝ «Անասնաբուժությունը՝ հանուն առողջ հասարակության» խորագրով համաժողովներ։

Միջոցառումների կազմակերպումը նպատակ ուներ խրախուսել անասնաբույժներին և կարևորել իրենց կատարած աշխատանքը գյուղատնտեսության զարգացման համար։

Արդեն հինգերորդ տարին է Հայաստանի Հանրապետությունում  պետական մակարդակով նշվում է Անասնաբույժի միջազգային օրը:

Այս տարի միջոցառումը կազմակերպվել է «Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի աջակցությամբ։

Շիրակում միջոցառման մասնակիցներին ողջունել և անասնաբույժի միջազգային օրվա առթիվ շնորհավորել է Շիրակի մարզպետ Մուշեղ Մուրադյանը․ «Պետք է փաստեմ, որ անասնաբուժությունն ամենակարևոր օղակներից մեկն է, կենդանու առողջ լինելը ուղիղ համամատական է մարդու առողջության հետ։ Անհերքելի է, որ Շիրակի մարզի համայնքների բնակիչների ապրուստի կարևոր միջոց շարունակում է մնալ անասնապահությունը։ Ուստի բանիմաց մասնագետի դերը, կենդանիներին բուժօգնություն ցուցաբերելու հարցում, անգնահատելի է»։

Պարոն Մուրադյանին ողջույնի խոսքով հաջորդեցին ՀՀ սննդամթերքի անվտանգության տեսչական մարմնի ղեկավարի տեղակալ Սոնա Ծառուկյանը, ՀՀ էկոնոմիկայի նախարարության «Գյուղատնտեսական ծառայությունների կենտրոն» ՊՈԱԿ-ի տնօրեն Գառնիկ Հովհաննիսյանը, և «Ռազմավարական զարգացման գործակալություն» ՀԿ-ի ներկայացուցիչ, ՄԱՎԵՏԱ ծրագրի ղեկավար Լիլիթ Հովհաննիսյանը։ Լիլիթ Հովհաննիսյանն իր խոսքում կարևորեց երիտասարդ անասնաբույժների դերը գյուղատնտեսության զարգացման գործում և ներկայացրեց ՄԱՎԵՏԱ ծրագրով ներդրված դուալ ուսուցման ձևի առավելություններն ու  առանձնահատկությունները։

«Ռազմավարական զարգացման գործակալություն» ՀԿ-ի անասնաբույժ Արեգ Սարուխանյանն ու ՀՀ ազգային ագրարային համալսարանի անասնաբուժական բժշկագիտության և անասնաբուծության ֆակուլտետի դեկան Արևիկ Աբովյանը ներկայացրեցին անասնաբույժ մասնագիտության կարևորությունը, ոլորտային խնդիրներն ու հնարավոր լուծումները։ Արեգ Սարուխանյանը հակիրճ անդրադարձ կատարեց «Ռազմավարական զարգացման գործակալություն» ՀԿ-ի կողմից իրականացվող՝ ոլորտի բարելավմանն ուղղված գործողություները։

Միջոցառումն ամփոփվեց ակտիվ քննարկմամբ և անասնաբույժների մասնակցությամբ նկարահանված ֆիլմի դիտմամբ։

Նոյեմբերի 17-ին «Ռազմավարական զարգացման գործակալություն» ՀԿ-ն «Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակներում Ստեփանավանի պետական գյուղատնտեսական քոլեջի հետ համագործակցությամբ կազմակերպեց «Վահան Գրիգորյան» ԱՁ-ին պատկանող առաջատար ֆերմա ուսումնաճանաչողական այց` Ստեփանավանի թիվ 6 դպրոցի աշակերտների համար:

Այցի նպատակն էր աշակերտներին ներկայացնել քոլեջում դուալ ուսուցմամբ ներդրվող գյուղ մասնագիտությունները և այս ուսուցման ձևի առավելություններն ու առանձնահատկությունները։

Այցի շրջանակներում ֆերմայի անասնաբույժ՝ Արթուր Տիտանյանը ներկայացրեց անասնաբուժություն մասնագիտությունը, խոսեց դրա կարևորության, ոլորտում թափուր աշխատատեղերի և մասնագիտության ծերացման մասին։

Պարոն Տիտանյանն իրականացրեց շրջայց ֆերմայի տարածքով և պատասխանեց աշակերտներին հուզող հարցերին։

Հանդիպմանը մասնակցում էին նաև Ստեփանավանի պետական գյուղատնտեսական քոլեջի կարիերայի պատասխանատուն և համապատասխան դասավանդողներ, ովքեր ներկայացրեցին քոլեջը և ուսուցանվող մասնագիտություններն ու ծրագրերը։

Աշակերտները հնարավորություն ունեցան ծանոթանալ տարբեր տոհմային կենդանիների պահվածքի առանձնահատկությունների, կթի կազմակերպման գործընթացի և կիրառվող ժամանակակից գյուղատնտեսական մեքենաների ու սարքավորումների հետ։