Հոկտեմբերի 14-ին պանրագործության հարուստ մշակույթ ունեցող Տաշիր քաղաքում, համայնքապետարանի նախաձեռնությամբ կազմակերպվեց պանրի՝ արդեն ավանդույթ դարձած ամենամյա փառատոնը, որը համընկել էր նաև Տաշիրի օրվա հետ։ Այս տարի «Ռազմավարական Զարգացման Գործակալություն» (ՌԶԳ) ՀԿ-ն «Անասնապահության զարգացում Հայաստանում` հարավ-հյուսիս» ծրագրի[1] շրջանակներում աջակցություն ցուցաբերեց համայնքապետարանին փառատոնի կազմակերպման գործում:

Փառատոնին իրենց արտադրանքն էին ներկայացրել Տաշիրի ու հարակից համայնքների պանրագործությամբ զբաղվող  գրեթե բոլոր ընկերություններն ու անհատ ձեռնարկատերերը, ինչպես նաև ՌԶԳ ՀԿ-ի ծրագրերի  շահառու ընկերություններ` Լոռու (Գրանդ Միլկ» Ա/Ձ-ն, «Լոռվա Կաթ» ՍՊԸ-ն, «Գագիկ Մանուկյան» Ա/Ձ-ն, «Վիգեն Գրիգորյան» Ա/Ձ-ն), Շիրակի («Հայկավան կաթ» Ա/Ձ-ն), Տավուշի («Տիգրան Շահնազարյան» Ա/Ձ-ն) և Գեղարքունիքի մարզերից («Ռոզա 1» ԳԿ-ն):

Կաթի վերամշակողները քաղաքային տոնին ներկայացրեցին իրենց բարձրորակ ու լայն ապրանքատեսականին` հնարավորություն տալով փառատոնի հյուրերին համտեսել ներկայացված արտադրանքը և գնահատել դրանց որակական ու համային հատկանիշները:

Պանրի, գինու ու քաղցրավենիքի առատ հյուրասիրությունը, համերգային ծրագրի ուղեկցմամբ, վերածեցին միջոցառումը իսկական տոնի տաշիրցիների և հյուրերի համար:

«Ռազմավարական Զարգացման Գործակալություն» ՀԿ-ի «Անասնապահության զարգացում Հայաստանի հարավում» ծրագրի երկու գործընկեր՝ «ՍԻՍ-ԱԼՊ»  ՍՊԸ-ն և «Թադ-Մ» ՍՊԸ-ն, ինչպես նաև «Տարածաշրջանային ՓՄՁ-ների մրցունակության խթանում» ծրագրի երկու ակտիվ շահառուներ՝ «Արկադյա Խաչիկյան» ԱՁ–ն և «Թության»  ՍՊԸ-ն այս տարի իրենց լայն ապրանքատեսականին ներկայացրեցին հանրությանը՝ արդեն ավանդական դարձած «Գյուղական կյանքի և ավանդույթների փառատոն»-ին:

Փառատոնի անցկացումը ամենամյա բնույթ է կրում և կազմակերպվում է գյուղատնտեսության աջակցության «Կանաչ արահետ» ՀԿ-ն` ՀՀ գյուղատնտեսության նախարարության, Երևանի քաղաքապետարանի և տեղական ու միջազգային կազմակերպությունների աջակցությամբ: Այս տարի Փառատոնը տեղի ունեցավ սեպտեմբերի 15-ին` Կիրովի անվան մանկական այգում: Փառատոնի հիմնական նպատակն է աջակցել գյուղական համայնքների զարգացմանը:

«Ռազմավարական Զարգացման Գործակալություն» ՀԿ-ն արդեն երրորդ տարին է, ինչ հանդիսանում է այս փառատոնի կազմակերպման գործընկերը: Փառատոնի ընթացքում անցկացվեցին մրցույթներ ֆերմերների միջև տարբեր անվանակարգերում, ինչպես նաև հետաքրքիր միջոցառումներ ու խաղեր երեխաների համար: Փառատոնը ուղեկցվում էր կենդանի երաժշտությամբ, ավանդական երգ ու պարով:

Այս «համեղ» փառատոնի ընթացքում ցուցադրվել է մրգի, բանջարեղենի, կաթնամթերքի, մեղրի, չրերի լավագույն տեսականին և բոլոր ներկաները հնարավորություն են ունեցել ոչ միայն համտեսել, այլ նաև գնել դրանք: Այս փառատոնի ընթացքում Հայաստանի, Վրաստանի և Իրանի ֆերմերները ներկայացրեցին իրենց բարձրորակ արտադրանքը, որն աչքի էր ընկնում նաև իր յուրահատուկ համով և տեսքով: