«Ռազմավարական զարգացման գործակալություն» ՀԿ-ի կողմից իրականացվող «Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակներում հունիսի 22-23-ը Ծաղկաձորում տեղի ունեցավ դասընթաց՝ ՄԿՈՒ ոլորտը լուսաբանող լրագրողների և ծրագրի գործընկեր քոլեջների ներկայացուցիչների մասնակցությամբ։

Կազմակերպության հաղորդակցման և գենդերի մասնագետ Աննա Պողոսյանը երկօրյա դասընթացի մասնակիցներին ներկայացրեց  ՄԿՈՒ ոլորտի լուսաբանման առանձնահատկությունները, մասնավորապես՝ կանանց ու խոցելի խմբերի ներգրավվածության խթանման տեսանկյունից։

ՄԱՎԵՏԱ ծրագրի ՄԿՈՒ խորհրդատու Լիլիթ Բեգլարյանը ներկաներին ընդհանուր տեղեկություններ հաղորդեց «Հայաստանում գյուղատնտեսության ոլորտում մասնագիտական կրթության և ուսուցման արդիականացում» ծրագրի նպատակների ու ընթացիկ աշխատանքների մասին։

Դասընթացի երկրորդ օրը փորձագետ Արթուր Բաղդասարյանը լրագրողների ու քոլեջների ներկայացուցիչների համար խոսեց դուալ կրթական մոտեցմամբ ուսումնառության տեղեկատվական ռազմավարության, ՄԿՈՒ համակարգի և զանգվածային լրատվամիջոցների մշտադիտարկման արդյունքների և սոցիալական ցանցերում ՄԿՈՒ հաստատությունների էջերի ներկայացման առանձնահատկությունների մասին։

ՄԿՈՒ հաստատությունների ներկայացուցիչներն իրենց ելույթներում անդրադարձան քոլեջներում դուալ կրթական մոտեցմամբ ներդրված մասնագիտություններին, մասնավոր հատված գործընկերների հետ համագործակցելու փորձին։

Այնուհետև ինտերակտիվ քննարկման միջոցով լրագրողներն ու քոլեջների ներկայացուցիչները վերհանեցին իրենց հուզող հարցերն ու մտահոգությունները, համագործակցության հնարավորությունները։

«Ռազմավարական զարգացման գործակալություն» ՀԿ-ի կողմից իրականացվող «Հայաստանի կենդանի լանդշաֆտները շուկայի զարգացման համար» (ԼԻԼԱ) և «Ոլորտների թվայնացում հանուն մրցունակության» ծրագրերի շրջանակներում Մոլդովայի Հանրապետությունում է կազմակերպության պատվիրակությունը։

Հունիսի 18-25-ը պատվիրակությունը, երկու ծրագրերի շահառուների ընդգրկմամբ, Մոլդովայում կայցելեն մի շարք առաջատար գինեգործարաններ, որոնք տրամադրում են զբոսաշրջային հետաքրքրիր փորձառություններ:

Այցի շրջանակներում ԼԻԼԱ ծրագրի մասնավոր հատվածի գործընկերները ծանոթանում են միջազգային փորձին, մոլդովական կողմի հետ աշխատանքային քննարկումներ ունենում՝ Հայաստանում զբոսաշրջային իրենց պրոդուկտները զարգացնելու և նորովի ներկայանալու համար:

Հունիսի 19-ին պատվիրակությունը՝ որպես հատուկ հյուր, Քիշնևում մասնակցեց «Անտրիմ» ներքին և ներգնա ցբոսաշրջության ազգային ասոցիացիայի 10 ամյակին նվիրված համաժողովին:

«Հայաստանի կենդանի լանդշաֆտները շուկայի զարգացման համար» ծրագրի համակարգող Ալլա Ղազարյանը համաժողովին ներկայացրեց երկու ծրագրերը, Հայաստանի մարզերն ու համայնքները գաստրո և կայուն զբոսաշրջության միջոցով զարգացնելու ուղղությամբ տարվող աշխատանքները, դրանց առանձնահատկություններն ու ձեռքբերումները:

Իր ելույթում Ալլա Ղազարյանը ընդգծեց զբոսաշրջության կարևորությունը Հայաստանում և Մոլդովայում համայնքների զարգացման ուղղությամբ՝ այս առումով որպես հաջողված փորձ նշելով գաստրո և գինու զբոսաշրջության համադրությունը:

Հունիսի 20-ին ԼԻԼԱ ծրագրի շահառուները, մոլդովական կողմի գործընկեր՝ «Անտրիմ» կազմակերպության ներկայացուցիչների հետ այցելեցին «Կրիկովա» գինու գործարան, ծանոթացան գինեգործության մոլդովական փորձին։

«Կրիկովա» գինեգործարանն իր տեսակով եզակի է աշխարհում և ներկայացնում է Մոլդովայի Հանրապետության ազգային-մշակութային ժառանգությունը: Այն հսկայական ստորգետնյա քաղաք է՝ մինչև 100 մ ստորգետնյա խորությամբ և ավելի քան 120 կմ ստորգետնյա փողոցներով՝ անկախ ենթակառուցվածքով:

Պատվիրակության այցը Մոլդովա շարունակվում է: