2023 թվականի նոյեմբերի 28-ին «Ռազմավարական զարգացման գործակալություն» ՀԿ-ի կողմից իրականացվող «RECONOMY» տարածաշրջանային ծրագրի «Ոլորտների թվայնացում հանուն մրցունակության» նախագծի շրջանակներում կազմակերպվել է առցանց հանդիպում-քննարկում «Ագրոնեկտ» ընկերության (Վրաստան) և Հայաստանի և Մոլդովայի առաջատար գյուղատնտեսական ընկերությունների և մասնագիտական ասոցիացիաների միջև:

Հանդիպման նպատակն էր ներկայացնել «Ագրոնեկտ» թվային հարթակը ԱլԳ երկրներում պոտենցիալ շահագրգիռ գործընկերներին, բացահայտել հետաքրքրություններն ու հետագա համագործակցության համար հնարավոր քայլերը։

«Ագրոնեկտ» -ը գյուղատնտեսական փորձագիտական թվային հարթակ է, որտեղ ֆերները կարող են խորհրդատվություն ստանալ աշխարհի լավագույն գյուղատնտեսների կողմից: Մի կողմից հարթակը ֆերմերների համար հասանելի է դարձնում գյուղատնտեսության ոլորտի բարձրակարգ մասնագետների խորհրդատվական ծառայությունները, իսկ մյուս կողմից՝ թույլ է տալիս փորձագետներին լրացուցիչ եկամուտ ստանալ՝ կիրառելով իրենց գիտելիքները: Իր մեկնարկից ի վեր «Ագրոնեկտ»-ն արդեն իսկ ներգրավել է իր հարթակում 10 տարբեր երկրների ֆերմերների և փորձագետ-խորհրդատուների և նախատեսում է հետագա ընդլայնում:

RECONOMY-ը Շվեդիայի միջազգային զարգացման համագործակցության գործակալության (Sida) տարածաշրջանային ներառական և կանաչ տնտեսական զարգացման ծրագիր է, որն իրականացվում է HELVETAS Swiss Intercooperation-ի կողմից՝ «Ռազմավարական զարգացման գործակալություն» ՀԿ-ի և Արևելյան Գործընկերության և Արևմտյան Բալկանների տարածաշրջաններում այլ կազմակերպությունների հետ համագործակցությամբ:

Սույն թվականի նոյեմբերի 21-23-ը, «Ռազմավարական զարգացման գործակալություն» հասարակական կազմակերպության կողմից իրականացվող «Հայաստանի սահմանամերձ համայնքների դիմակայունության ամրապնդում և տնտեսական վերականգնում» ծրագրի շրջանակներում անցկացվեցին թեմատիկ դասընթացներ՝ գյուղատնտեսության զարգացման գործում կանանց դերի, կենդանիների պահվածքի, արհեստական սերմնավորման, կերարտադրության և բարձրարժեք կերային մշակաբույսերի մշակության ու սերմնաբուծության մասին։

Դասընթացների նպատակն էր ֆերմերներին ներկայացնել նորածին հորթերից մինչև հասակավոր կենդանիների պահվածքի առանձնահատկությունները, մթերատվության բարձրացման համար անհրաժեշտ գործողություններն ու արհեստական սերմնավորման առավելությունները։

Դասընթացներին մասնակցեց 193 ֆերմեր։

«Հայաստանի սահմանամերձ համայնքների դիմակայության ամրապնդում և տնտեսական վերականգնում» ծրագիրը ֆինանսավորվում է Շվեյցարիայի զարգացման և համագործակցության գործակալության կողմից և իրականացվում է ՄԱԿ-ի Պարենի համաշխարհային ծրագրի միջոցով՝ «Վորլդ Վիժն Հայաստան»-ի, «Մանկական զարգացման հիմնադրամ»-ի և «Ռազմավարական զարգացման գործակալություն» ՀԿ-ի հետ համագործակցությամբ։

Ծրագրի նպատակն է բարելավել Վարդենիս (Գեղարքունիք), Սիսիան (Սյունիք) և Ջերմուկ (Վայոց ձոր) համայնքների սահմանամերձ բնակավայրերի ճգնաժամերին դիմակայելու կարողությունը՝ տրամադրելով մարդասիրական և տնտեսական աջակցություն։