«Հայաստանի կենդանի լանդշաֆտները շուկայի զարգացման համար» (ԼԻԼԱ) ծրագրի շրջանակում հաջողությամբ անցկացվեց PUM-ի մասնագիտացված «Տեղական խոհանոցի զարգացում» թեմայով գործնական դասընթացը, որը համախմբեց «Խաչիկ» թխարանի և Sheram by Mariam-ի տաղանդավոր խոհարարական թիմերին՝ ինտենսիվ գործնական ուսուցման միջոցով ծանոթանալու հրուշակագործության եվրոպական ավանդույթներին։։

Դասընթացը վարեց միջազգային ճանաչում ունեցող վարպետ-հրուշակագործ Բերտ Շտիհաուդերը, որի առաջնորդությամբ մասնակիցները կատարելագործեցին եվրոպական ավանդական հրուշակագործության տեխնիկաներին տիրապետումը։ Նրանք գործնական ուսուցում ստացան իտալական և ֆրանսիական դասական հացաբուլկեղենի պատրաստման մեջ, ինչպիսիք են  բագետը, կրուասանը, պան օ շոկոլադը, չիաբատտան և ֆոկաչան։

Վերապատրաստման շնորհիվ մասնակիցները ոչ միայն խորացրին իրենց գիտելիքները հրուշակագործության տեխնիկական նրբությունների և մշակութային նշանակության վերաբերյալ, այլև հնարավորություն ունեցան միջազգային փորձի և տեղական վարպետության արդյունավետ փոխանակման։ Դասընթացը խթանեց բարձր չափանիշների կիրարկումը, տեխնիկական ճշգրտությունը և նորարարական մոտեցումները՝ տեղական խոհարարական ոլորտում արտադրանքի զարգացման ու արդիականացման ուղղությամբ։

Այս նախաձեռնությունը կարևոր քայլ է տեղական խոհարարական ներուժի շարունակական զարգացման գործում՝ համադրելով ավանդական փորձառությունը միջազգային չափանիշների հետ և բացելով նոր հեռանկարներ որակյալ արտադրության ու ձեռնարկատիրության համար Հայաստանի սննդարդյունաբերության ոլորտում։

Երբ գիտելիքն ու ավանդույթը միավորվում են, գերազանցությունը դառնում է իրականություն։

ԼԻԼԱ ծրագիրը ֆինանսավորվում է Շվեյցարիայի զարգացման և համագործակցության գործակալության (SDC) կողմից և իրականացվում Բնության համաշխարհային հիմնադրամի հայաստանյան մասնաճյուղի կողմից (WWF-Հայաստան)՝ «Ռազմավարական զարգացման գործակալություն» (ՌԶԳ) ՀԿ-ի հետ համատեղ:

Սեպտեմբերի 10-ին Արարատի համայնքապետարանում կայացավ համագործակցության առանցքային հանդիպում, որի ընթացքում համայնքի ղեկավար Ասլան Ավետիսյանը, Գյուղաջակցության խորհրդատվական ծառայության Վեդիի թիմի համակարգող Վարդան Իվանյանը, Գյուղաջակցության խորհրդատվական ծառայության փորձագետ Պարույր Ասատրյանը, ինչպես նաև համայնքի գյուղատնտեսության բաժնի ներկայացուցիչները քննարկեցին համատեղ քայլերը՝ գյուղատնտեսական խորհրդատվությունը հասանելի դարձնելու համայնքի բոլոր թիրախ բնակավայրերում։

Քննարկման առանցքային ուղղությունները՝

🔹 IADAAM ծրագրի խորհրդատվական բաղադրիչի նպատակների ու գործառույթների ներկայացում

🔹 Համագործակցության ձևաչափերի սահմանում՝ համայնքի գյուղատնտեսական բաժնի և AES թիմերի միջև

🔹 Համայնքի բոլոր բնակավայրերում իրազեկման բարձրացում՝ հանդիպումների, և թվային գործիքների միջոցով

🔹 Խորհրդատվական հոսքերի կառավարման մեխանիզմների քննարկում՝ թափանցիկության և արդյունավետության ապահովման նպատակով

Այս համագործակցությունը ևս մեկ քայլ է դեպի գիտելիքահեն, կայուն և զարգացող գյուղատնտեսություն, որտեղ գիտելիքը դառնում է բերքահավաքի հիմնասյուն։ 

«Ոռոգվող գյուղատնտեսության զարգացումը Արարատի և Արմավիրի մարզերում» (IADAAM) ծրագիրը, որը ֆինանսավորվում է Եվրոպական միության միջոցով (ԵՄ), Զարգացման ֆրանսիական գործակալության (ԶՖԳ) իրականացմամբ, համապարփակ նախաձեռնություն է, որի նպատակն է վերափոխել ոռոգվող գյուղատնտեսությունը Հայաստանում։

IADAAM ծրագրում տեխնիկական աջակցության բաղադրիչն իրականացվում է «Ագրո քընսալթինգ Եվրոփ»-ի գլխավորած «Ավենյու քընսալթինգ գրուպ»-ի, «Ռազմավարական զարգացման գործակալություն» ՀԿ-ի և «3 ԱՐ Ստրատեգիա» ՍՊԸ մասնակցությամբ կոնսորցիումի կողմից, որը հանդես է գալիս որպես ծրագրի օպերատոր՝ նպատակ ունենալով ինստիտուցիոնալ աջակցություն տրամադրել ՀՀ էկոնոմիկայի նախարարությանը՝ թիրախային ոլորտներում գյուղատնտեսական քաղաքականության և բարեփոխումների մշակման գործում։