Եվրոպական միության ֆինանսական աջակցությամբ, «Ռազմավարական զարգացման գործակալություն» (ՌԶԳ) ՀԿ կողմից իրականացվող «Համագործակցության խթանում՝ հանուն ՄԿՈՒ ոլորտում աշխատանքի վրա հիմնված ուսուցման արդյունավետ հնարավորությունների» ծրագրի շրջանակներում հիմք դրվեց ՀՀ Սյունիքի մարզի Գորիսի պետական գյուղատնտեսական քոլեջի և գործընկեր/հյուրընկալող ընկերությունների միջև համագործակցությանը:

Կողմերը կնքեցին պայմանագրեր՝ որով պարտավորվում են ապահովել Կաթի և կաթնամթերքի տեխնոլոգիա և Անասնաբուժություն մասնագիտությունների ուսանողների որոկյալ կրթությունը՝ հիմք ընդունելով նոր ներդրված Աշխատանքի վրա հիմնված ուսուցման մոդելը: Ուսանողները այսուհետ գործնական դասաժամերը կանցկացնեն գործատուների մոտ՝ ձեռք բերելով պրակտիկ հմտություններ և կարողություններ:

Այս համագործակցությունը քոլեջի և գործատուների միջև նպաստելու է Սյունիքի մարզում կրթության ոլորտի զարգացմանը և աշխատաշուկայի համալրմանը որակյալ մասնագետներով:

Շվեյցարիայի Համադաշնության Զարգացման և Համագործակցության Գործակալության ու Ավստրիական Զարգացման և Համագործակցության ծրագրային միավոր Ավստրիայի Զարգացման Գործակալության կողմից ֆինանսավորվող «Անասնապահության զարգացում Հայաստանում՝ հարավ-հյուսիս» ծրագրի շրջանակներում սույն թվականի hուլիսի 14-ին տեղի ունեցավ շրջայց Լոռու մարզպետ՝ Անդրեյ Ղուկասյանի, «Ռազմավարական զարգացման գործակալություն» (ՌԶԳ) ՀԿ-ի նախագահ Մկրտիչ Այվազյանի և «Անասնապահության զարգացում Հայաստանում՝ հարավ-հյուսիս» ծրագրի ղեկավար՝ Վահե Հովհաննիսյանի մասնակցությամբ:

Շրջայցի նպատակն էր ծանոթանալ «Անասնապահության զարգացում Հայաստանում՝ հարավ-հյուսիս» ծրագրի գործունեությանը, ներկայացնել ՀՀ Լոռու մարզում իրականացված ծրագրային միջամտությունների ուղղություններն ու քննարկել գրանցած արդյունքները:

Շրջայցի մասնակիցներն այցելեցին ք. Վանաձորում գտնվող Ծրագրի շահառու ԱՁ “Տարոն Մաթևոսյան”  կաթի վերամշակման արտադրամաս,   Գյուլագարակ համայնքի Հոբարձի բնակավայրի անասնաբուժական կետ, Տաշիր համայնքի՝ Տաշիր-Լեռնահովիտ ճանապարհին գտնվող Վահան Գրիգորյանի «Առաջատար ֆերմա», ինչպես նաև  շրջայց կատարեցին Մեծավան համայնքի Պաղաղբյուր բնակավայրի արոտային բարելավված ենթակառուցվածքներով:

ՀՀ Լոռու մարզպետ՝ Անդրեյ Ղուկասյանը բարձր գնահատեց ՌԶԳ ՀԿ կողմից իրականացվող ծրագրային միջամտությունները, կատարված լայնածավալ աշխատանքները Լոռու մարզում և կարևորեց ծրագրի դերը համայնքների զարգացման գործում: