Նոյեմբերի 21-ին Երևանում կայացավ «ՀՀ բնական կերհանդակների՝ արոտավայրերի և խոտհարքների կայուն կառավարմանն ուղղված ծրագրերի համակարգման հարթակ»-ի 6-րդ աշխատաժողովը, որի հիմնական նպատակն էր ներկայացնել` վերջին ամսինսներին մշակվող ՀՀ բնական կերհանդակների՝ արոտավայրերի և խոտհարքների կայուն կառավարման հայեցակարգի աշխատանքային տարբերակը: Աշխատաժողովին մասնակցում էին բնական կերհանդակների ոլորտին առնչվող տարբեր նախարարությունների, ՀՀ Ազգային ժողովի, ինչպես նաև հասարակական, միջազգային և գիտական կառույցների ներկայացուցիչներ:

Միջոցառման սկզբում մասնակիցներին ողջունեցին և բեղմնավոր աշխատանք մաղթեցին ՀՀ Տարածքային կառավարման և ենթակառուցվածքների նախարարության Տեղական ինքնակառավարման քաղաքականության վարչության պետ Աշոտ Գիլոյանը և ՀՀ ԱԺ Տարածքային կառավարման, ՏԻ, գյուղատնտեսության և բնապահպանության հարցերի մշտական հանձնաժողովի անդամ պատգամավոր Մաթևոս Ասատրյանը և նույն հանձնաժողովի փորձագետ Աշոտ Հարությունյանը: Խոսնակները կարևորեցին Հարթակի գործունեությունը՝ մատնանշելով հատկապես վերջին նախաձեռնությունների՝ այն է Սյունիքի մարզում կենդանիների կանոնակարգված տեղաշարժիկազմակերպման և Բնական կերհանդակների կայուն կառավարման հայեցակարգի մշակման ուղղությամբ տարավող աշխատանքները:

Աշխատաժողովի ընթացքում ներկայացվեց Հարթակի նոր գործընկեր «Անասնաբույժների ազգային ասոցիացիա» ՀԿ-ն:

Միջոցառման ընթացքում ներկայացվեցին արոտավայրերի կայուն կառավարման փորձի ուսումնասիրման նպատակով, Հարթակի կողմից տարբեր շահագրգիռ կառույցների ներկայացուցիչների համար կազմակերպված՝ դեպի Ղրղզստանի Հանրապետություն ուսուցողական այցի արդյունքները և քաղած դասերը, ինչպես նաև Հարթակի նախաձեռնությամբ և պետական, համայնքային և հասարակական կառույցների համագործակցության արդյունքում մշակված ՀՀ բնական կերհանդակների՝ արոտավայրերի և խոտհարքների կայուն կառավարման հայեցակարգի աշխատանքային տարբերակը:

ՀՀ Բնական կերհանդակների՝ արոտավայրերի և խոտհարքների կայուն կառավարմանն ուղղված ծրագրերի համակարգման հարթակը հանդիսանում է «Ռազմավարական զարգացման գործակալություն» (ՌԶԳ) ՀԿ-ի, Գերմանիայի Միջազգային Համագործակցության Ընկերության (ԳՄՀԸ) աջակցությամբ իրականացվող «Կենսաբազմազանության ինտեգրված կառավարումը Հարավային Կովկասում» (ԿԻԿ) ծրագրի և Համաշխարհային բանկի աջակցմամբ և ՀՀ Էկոնոմիկայի նախարարության կողմից իրականացվող ՀԳՌԿՄ 2-րդ ծրագրի համատեղ նախաձեռնություն:

2019թ. նոյեմբերի 13-ին, Հայաստանի ազգային ագրարային համալսարանի (ՀԱԱՀ) Սիսիանի մասնաճյուղում տեղի ունեցավ «Կաթի և կաթնամթերքի տեխնոլոգիա» մասնագիտության փորձարարական լաբորատորիայի բացման միջոցառումը:

«Կաթի և կաթնամթերքի տեխնոլոգիա» մասնագիտության փորձարարական լաբորատորիան հիմնվել է «Մասնագիտական կրթության և ուսուցման զարգացում Սյունիքի մարզում» ծրագրի աջակցությամբ, որն իրականացվում է «Ռազմավարական զարգացման գործակալություն» (ՌԶԳ) ՀԿ կողմից և Կիրառական գիտությունների Բեռնի համալսարանի գյուղատնտեսության, անտառային և պարենային գիտությունների դպրոց (HAFL)- ի հետ համատեղ, HEKS/EPER շվեյցարական կազմակերպության աջակցությամբ, 2016թ.-ի հոկտեմբերի 1-ից:

Միջոցառմանը ողջույնի խոսքով հանդես եկան Սիսիան համայնքի ղեկավար՝ պրն. Արթուր Սարգսյանը, ՀՀ Սյունիքի մարզպետարանի գյուղատնտեսության բաժնի պետ՝ պրն. Գագիկ Խաչատրյանը, «Ռազմավարական զարգացման գործակալություն» ՀԿ-ի նախագահ՝ պրն. Մկրտիչ Այվազյանը, Հայաստանի ազգային ագրարային համալսարանի ռեկտոր՝ պրն. Վարդան Ուռուտյանը, ՀԱԱՀ Սիսիանի մասնաճյուղի տնօրեն՝ պրն. Տիգրան Վանդունցը: Բոլորն իրենց խոսքում ընդգծեցին լաբորատորիայի կարևորությունը, քանի որ այն ուսանողների համար նոր հնարավորություններ կընձեռի:

Միջոցառմանը ներկա էին նաև համայնքի առաջատար գործատուներ, ՀԱԱՀ Սիսիանի մասնաճյուղի դասախոսներ, ուսանողներ և նրանց ծնողները:

Լաբորատորիայի պաշտոնական բացման արարողությունից հետո մասնակիցները հնարավորություն ունեցան շրջայց կատարել լաբորատորիայում:

«Կաթի և կաթնամթերքի տեխնոլոգիա» մասնագիտության փորձարարական լաբորատորիայի հիմնումը մեծ ձեռքբերում է ՀԱԱՀ Սիսիանի մասնաճյուղի համար: Ուսանողները կծանոթանան պանրի ու կաթնամթերքի արտադրության հետ կապված տեխնոլոգիաներին, հնարավորություն կունենան համատեղել տեսական և գործնական գիտելիքները և ձեռք բերել աշխատանքային շուկայի պահանջներին համապատասխան հմտություններ: