Հունիսի 28-ին Իբիս Երևան Կենտրոն հյուրանոցում տեղի ունեցավ “Կրտսեր անասնաբույժ” մասնագիտության ուսումնառության նյութերի ներկայացում/քննարկում: Հանդիպումը կազմակերպվել էր «Ռազմավարական զարգացման գործակալություն» ՀԿ-ի կողմից “ՄԿՈՒ զարգացում Սյունիքի մարզում” ծրագրի շրջանակներում:

Հանդիպմանը ներկա էին ՀՀ Սննդամթերքի անվտանգության տեսչական մարմնի ղեկավարը և անասնաբուժության տեսչության պետը, Գորիսի, Ստեփանավանի և Գավառի պետական գյուղատնտեսական քոլեջների, Հայաստանի ազգային ագրարային համալսարանի նաև Սիսիանի մասնաճյուղի անասնաբուժության մասնագիտության դասախոսներ, մասնավոր անասնաբույժներ և այլն:

Հանդիպման մեկնարկին ողջույնի խոսքով հանդես եկան “ՄԿՈՒ զարգացում Սյունիքի մարզում” ծրագրի ղեկավար Լիլիթ Հովհաննիսյանը և ՀՀ Սննդամթերքի անվտանգության տեսչական մարմնի ղեկավար` պրն. Գեորգի Ավետիսյանը: Պրն. Գ. Ավետիսյանը նախ ողջունեց մասնակիցներին, այնուհետև մեծ կարևորություն տվեց ուսումնական նյութերի մշակմանը, որոնք անհրաժեշտ են որակյալ մասնագետներ պատրաստելու համար:

Ողջույնի խոսքերից հետո, փորձագետները սկսեցին յուրաքանչյուր մոդուլի համար մշակված նյութերի ներկայացումը: Ներկայացվեց նյութերի ընդհանուր կառուցվածքը, որը պարունակում է տեքստ, պատկերներ, հետաքրքիր փաստեր, գիտելիքները ստուգելու համար համապատասխան թեստեր:

Այնուհետև փորձագետները համառոտ ներկայացրեցին ընդհանուր և հատուկ մասնագիտական մոդուլների ուսումնառության արդյունքները, յուրաքանչյուր մոդուլի նկարագիրը և կատարման չափանիշները:

Մասնակիցները հնարավորություն ունեցան նաև ներգրավվել բուռն քննարկումների մեջ, ներկայացնել մեկնաբանություններ և առաջարկներ: Բոլոր առաջարկները հաշվի են առնվել փորձագետների կողմից և կկիրառվեն նյութերի վերջնականացման գործընթացի ժամանակ:

Նյութերի վերջնականացումից հետո, կտպագրվի ուսումնական ձեռնարկ, որը հասանելի կլինի բոլոր քոլեջներին և հնարավորություն կտա նրանց 2019թ. սեպտեմբերից առավել արդյունավետ կազմակերպել “կրտսեր անասնաբույժ” մասնագիտության ուսուցումը:

2019թ. հունիսի 5-7-ին Գորիսի պետական գյուղատնտեսական քոլեջում տեղի ունեցավ «Կաթի և կաթնամթերքի տեխնոլոգիա» մասնագիտության դասախոսների վերապատրաստման եռօրյա դասընթաց: Դասընթացը կազմակերպվել էր «ՄԿՈՒ զարգացում Սյունիքի մարզում» ծրագրի շրջանակներում «Ռազմավարական զարգացման գործակալություն» ՀԿ-ի կողմից: Դասընթացին մասնակցեցին 10 դասախոս Գորիսի պետական գյուղատնտեսական քոլեջից, ՀԱԱՀ Սիսիանի մասնաճյուղից, Ստեփանավանի պետական գյուղատնտեսական քոլեջից, Գավառի պետական գյուղատնտեսական քոլեջից, Հայ-հունական պետական քոլեջից: Դասընթացի հիմնական նպատակն էր զինել դասախոսներին համապատասխան գիտելիքներով և պրակտիկ հմտություններով, որոնք նրանք կարող են օգտագործել ուսանողների հետ իրենց հետագա աշխատանքում:

Դասընթացի ընթացքում դասախոսները նախ իրականացրեցին մանրէաբանական հետազոտություններ, ծանոթացան չանախ և սուլուգունի պանիրների պատրաստման տեխնոլոգիային և փորձարկեցին լաբորատորիայում առկա նորագույն սարքավորումները, ինչպես նաև մասնագետի օգնությամբ ինքնուրույն պատրաստեցին չանախ և սուլուգունի պանիրներ: Պանիրների պատրաստման գործընթացը բավականին ոգեշնչող էր, քանի որ մասնակիցները առաջին անգամ կարողացան կիրառել իրենց ունեցած և արդեն իսկ նոր ստացած տեսական գիտելիքները պրակտիկայում՝ ստանալով իրենց իսկ ձեռքով պատրաստած արտադրանքը: Բոլոր գործնական աշխատանքները տեղի ունեցան Գորիսի պետական գյուղատնտեսական քոլեջում հիմնված Կաթի վերամշակման փորձարարական լաբորատորիայում:

Դասընթացի ընթացքում կազմակերպվեց նաև այց «Էլոլա» գործարան, որը ոլորտում տարածաշրջանի խոշոր գործարաններից մեկն է: Գործարանում կատարվեց շրջայց, որի ընթացքում դասախոսները ծանոթացան կաթի վերամշակման բոլոր գործընթացներին և սարքավորումների աշխատանքին: