«Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակում գործընկեր ուսումնական հաստատությունների կարողությունների զարգացման նպատակով «Ռազմավարական զարգացման գործակալություն» ՀԿ-ն հունվարի 14-ին 8 բարձրացեղ կով նվիրեց ՀԱԱՀ Սիսիանի մասնաճյուղին։

Հանձնման պաշտոնական արարողությանը մասնակցում էին Սիսիանի համայնքապետ Հովսեփ Առաքելյանը, ՀԱԱՀ ռեկտորի պաշտոնակատար Հրաչյա Զաքոյանը, ՄԱՎԵՏԱ ծրագրի մասնավոր հատվածի գործընկերներ, դասավանդողներ և ուսանողներ։

Ողջունելով ներկաներին ՀԱԱՀ Սիսիանի մասնաճյուղին կից գործող գյուղատնտեսական կենտրոնում՝ մասնաճյուղի տնօրեն Գագիկ Խաչատրյանը կարևորեց ՄԱՎԵՏԱ ծրագրի աջակցությամբ միջին մասնագիտական կրթական ծրագրում իրականացվող դուալ ուսուցմամբ կրթության ներդրումը, նշելով, որ տոհմային կովերի ձեռք բերումը ևս մեկ քայլ է ուսանողների պրակտիկ ուսուցումը, նորարարական գյուղատնտեսության զարգացումը խթանելու համար։

Իր խոսքում ՄԱՎԵՏԱ ծրագրի ղեկավար Լիլիթ Հովհաննիսյանը նշեց, որ ծրագիրը շարունակում է աշխատել գյուղատնտեսական մասնագիտությունների արդիականացման, քոլեջ-գործատու կապի ամրապնդման, աշխատաշուկայի պահանջարկին համապատասխան մասնագետների պատրաստման և միջազգային առաջատար փորձի հայաստանյան գործընկեր ՄԿՈՒ հաստատություններում ներդրման ուղղություններով։

ՀԱԱՀ ռեկտորի պարտականությունները կատարող Հրաչյա Զաքոյանն իր ելույթում ընդգծեց ՄԱՎԵՏԱ ծրագրի շարունակական աջակցությունը՝ Երևանում և Սիսիանում ՀԱԱՀ ՄԿՈՒ հաստատությունների կարողությունների զարգացման գործում։ Այս համատեքստում Հ․ Զաքոյանը ՀԱԱՀ անունից շնորհակալագիր հանձնեց «Ռազմավարական զարգացման գործակալություն» ՀԿ-ին։

ՀԱԱՀ Սիսիանի մասնաճյուղի միջին մասնագիտական կրթական ծրագրի «Կաթի և կաթնամթերքի տեխնոլոգիա» բաժնի ուսանողները տեղում լաբորատոր փորձաքննության ենթարկեցին անասնաֆերմայում ստացված կաթի ֆիզիկաքիմիական ցուցանիշները և արձանագրեցին, որ դրանք համապատասխանում են պահանջվող նորմերին։

Ներկաները նաև մասնաճյուղի լաբորատորիայում պատրաստված պանիրը համտեսելու հնարավորություն ունեցան։

ՄԱՎԵՏԱ ծրագիրը ֆինանսավորվում է միջազգային և տեղական կազմակերպությունների լայն կոալիցիայի կողմից՝ Շվեյցարիայի զարգացման և համագործակցության գործակալության (SDC) գլխավորությամբ, ներառյալ Ավստրիական զարգացման գործակալությունը (ADA), Գերմանիայի տնտեսական համագործակցության և զարգացման նախարարությունը (BMZ), Հայաստանի կառավարությունը, Շվեյցարիայի եկեղեցու օգնություն (HEKS/EPER) ՀԿ-ն, Իզմիրլյան հիմնադրամը, Ռազմավարական զարգացման գործակալություն (ՌԶԳ) ՀԿ-ն և «Վանանդ Ագրո» ՓԲԸ-ն:

Ծրագիրն իրականացնող գործընկերներն են Գերմանական միջազգային համագործակցության ընկերությունը (GIZ) և Շվեյցարիայի եկեղեցու օգնություն (HEKS/EPER) ՀԿ-ն՝ ՌԶԳ-ի և Բեռնի Կիրառական գիտությունների համալսարանի (HAFL) գյուղատնտեսական, անտառային և պարենային գիտությունների դպրոցի ներգրավմամբ:

«Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակներում «Ռազմավարական զարգացման գործակալություն» (ՌԶԳ) ՀԿ-ն ՀՀ ԿԳՄՍ նախարարության հետ համագործակցությամբ դեկտեմբերի 19-20-ին Դիլիջանում կազմակերպեց Շահագրգիռ կողմերի երկխոսության հարթակի հերթական հանդիպումը:

Հանդիպմանը մասնակցեցին ՀՀ ԿԳՄՍ նախարարի տեղակալ Արաքսիա Սվաջյանը, նախարարության նախնական (արհեստագործական) և միջին մասնագիտական կրթության վարչության պետ Արմենուհի Պողոսյանը, Շվեյցարիայի զարգացման և համագործակցության գործակալության տնտեսական զարգացման ծրագրերի ղեկավար Արթուր Փոքրիկյանը, ՌԶԳ նախագահ Մկրտիչ Այվազյանը, ՄԿՈՒ ոլորտու ծրագրեր իրականացնողներ և ծրագրի սոցիալական գործընկերներ:

Ողջունելով հանդիպման մասնակիցներին՝ Մկրտիչ Այվազյանն իր խոսքում ընդգծեց շահագրգիռ կողմերի պարբերաբար հանդիպումների կարևորությունը երկխոսության և քննարկումների միջոցով ՄԿՈՒ ոլորտում առկա խնդիրների վերհանման, տարվող աշխատանքների վերաբերյալ միմիանց իրազեկման, ինչպես նաև հարթակի համակարգման ու ընդլայնման տեսանկյունից:

ՀՀ ԿԳՄՍ նախարարի տեղակալ Արաքսիա Սվաջյանը ներկայացրեց պետական ռազմավարությունն ու բարեփոխումները ՄԿՈՒ ոլորտում, մասնավորապես՝ օրենսդրության կատարելագործման, ոլորտային կառույցների արդիականացման ուղղությամբ: Արաքսիա Սվաջյանն ընդգծեց ուսուցանվող մասնագիտությունների գրավչության բարձրացման, հաստատությունների որակյալ կառավարման և երիտասարդներին դեպի ՄԿՈՒ ուղղորդման անհրաժեշտությունը: Այս համատեքստում նախարարի տեղակալը կարևորեց ՄԱՎԵՏԱ ծրագրով գյուղատնտեսական մի շարք մասնագիտությունների դուալ ուսուցմամբ ներդնելու փորձը:

Շվեյցարիայի զարգացման և համագործակցության գործակալության տնտեսական զարգացման ծրագրերի ղեկավար Արթուր Փոքրիկյանն ընդգծեց միջազգային առաջատար փորձի ներդնումը Հայաստանում ՄԿՈՒ ոլորտի արդիականացման ուղղությամբ և այս համատեքստում պետական կառույցների, տեղական և միջազգային կազմակերպությունների ջանքերի համադրումը:

ՀՀ ԿԳՄՍ նախարարության վարչության պետ Արմենուհի Պողոսյանը ներկայացրեց ՄԿՈՒ ոլորտում առկա իրավիճակը, նոր օրենքով ու ենթաօրենսդրական ակտերով կարգավորումները, խնդիրներն ու մարտահրավերները, որոնց բախվում են բարեփոխումների ընթացքում և պետական մոտեցումները ՄԿՈՒ հաստատությունների  արդիականացման  և աշխատաշուկայի պահանջներին համապատասխան որակյալ մասնագետների պատրաստման ուղղությամբ:

ՄԱՎԵՏԱ ծրագրի ղեկավար Լիլիթ Հովհաննիսյանը ներկայացրեց  դուալ ուսուցմամբ մասնագիտությունների, ուսումնական հաստատություն-գործատու համագործակցության փորձը և ծրագրային ձեռքբերումները:

Հանդիպման երկրորդ մասը նվիրված էր երկխոսության հարթակի աշխատանքների հետագա համակարգման, ղեկավարման և ընդլայնման հնարավորությունների քննարկմանը:

Երկրորդ օրվա ընթացքում հանդիպմանը ներկա միությունները և ասոցիացիաները ներկայացրեցին մասնավորի և հենց իրենց դերը և կարևորությունը ՄԿՈՒ-ում::

ՄԱՎԵՏԱ ծրագիրը ֆինանսավորվում է միջազգային և տեղական կազմակերպությունների լայն կոալիցիայի կողմից՝ Շվեյցարիայի զարգացման և համագործակցության գործակալության (SDC) գլխավորությամբ, ներառյալ Ավստրիական զարգացման գործակալությունը (ADA), Գերմանիայի տնտեսական համագործակցության և զարգացման նախարարությունը (BMZ), Հայաստանի կառավարությունը, Շվեյցարիայի եկեղեցու օգնություն (HEKS/EPER) ՀԿ-ն, Իզմիրլյան հիմնադրամը, Ռազմավարական զարգացման գործակալություն (ՌԶԳ) ՀԿ-ն և «Վանանդ Ագրո» ՓԲԸ-ն:

Ծրագիրն իրականացնող գործընկերներն են Գերմանական միջազգային համագործակցության ընկերությունը (GIZ) և Շվեյցարիայի եկեղեցու օգնություն (HEKS/EPER) ՀԿ-ն՝ ՌԶԳ-ի և Բեռնի Կիրառական գիտությունների համալսարանի (HAFL) գյուղատնտեսական, անտառային և պարենային գիտությունների դպրոցի ներգրավմամբ: