«Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակներում մարտի 3- 6-ը Գեղարքունիքի մարզի Ճամբարակ համայնքում իրականացվեց «Անասնապահության ընդհանուր դրույթներն ու արդյունավետ մոտեցումները» թեմայով կարճաժամկետ վերապատրաստման դասընթաց` Արցախից (Լեռնային Ղարաբաղից) տեղահանված անձանց և տեղացի խոցելի խմբերի ներկայացուցիչների համար։

Եռօրյա դասընթացը վարեց Հայաստանի ազգային ագրարային համալսարանի դոցենտ Արևիկ Ազիզյանը։

Վերապատրաստման դասընթացին մասնակիցները ծանոթացան կովերի հայտնի և Հայաստանում բուծվող ցեղերին, դրանց արդյունավետ պահվածքի և խնամքի տեխնոլոգիաներին, նախիրի կառավարման, վերարտադրության,  կերարտադրության կազմակերպման մոտեցումներին, ինչպես նաև արհեստական սերմնավորման նշանակության, անասնաբուժական-սանիտարական հիմնական միջոցառումներին։

ՄԱՎԵՏԱ ծրագիրը ֆինանսավորվում է միջազգային և տեղական կազմակերպությունների լայն կոալիցիայի կողմից՝ Շվեյցարիայի զարգացման և համագործակցության գործակալության (SDC) գլխավորությամբ, ներառյալ Ավստրիական զարգացման գործակալությունը (ADA), Գերմանիայի տնտեսական համագործակցության և զարգացման նախարարությունը (BMZ), Հայաստանի կառավարությունը, Շվեյցարիայի եկեղեցու օգնություն (HEKS/EPER) ՀԿ-ն, Իզմիրլյան հիմնադրամը, Ռազմավարական զարգացման գործակալություն (ՌԶԳ) ՀԿ-ն և «Վանանդ Ագրո» ՓԲԸ-ն:

Ծրագիրն իրականացնող գործընկերներն են Գերմանական միջազգային համագործակցության ընկերությունը (GIZ) և Շվեյցարիայի եկեղեցու օգնություն (HEKS/EPER) ՀԿ-ն՝ ՌԶԳ-ի և Բեռնի Կիրառական գիտությունների համալսարանի (HAFL) գյուղատնտեսական, անտառային և պարենային գիտությունների դպրոցի ներգրավմամբ:

«Ոռոգվող գյուղատնտեսության զարգացումը Արարատի և Արմավիրի մարզերում» (IADAAM) ծրագրի արժեշղթաների միջազգային փորձագետ Դարիո Կակամիսին, ազգային փորձագետներ Տիգրան Հախնազարյանի և Լիլիթ Պետրոսյանի հետ համատեղ, ավարտել են շուկայի հետազոտությունը, ամրագրել են արժեշղթաների ընտրության հիմնարար ուղղությունները և ներկայացրել են Արարատի և Արմավիրի մարզերի համար արժեշղթաների ցանկը (տե՛ս ինֆոգրաֆիկան)։

Հետազոտության ընթացքում նրանք անցկացրել են մի շարք հանդիպումներ Արարատի և Արմավիրի մարզերում IADAAM ծրագրի գյուղաջակցության խորհրդատվական ծառայության համակարգողների, փորձագետների և ֆերմերների հետ։

Արժեշղթաների ընտրության շրջանակում IADAAM ծրագիրը շեշտադրում է՝

✔️Արագ աճող ոլորտներ՝ Բարձր պահանջարկ ունեցող մշակաբույսերի հայտնաբերում

✔️ Արտահանման բազմազանեցում՝ Կախվածության նվազեցում մեկ շուկայից

✔️ Արժեքի ավելացման ռազմավարություն՝ Արդյունավետության և արտադրանքի որակի բարձրացում

✔️ Կայուն պրակտիկաները՝ Կլիմայի փոփոխության նկատմամբ դիմակայունության և արտադրողականության բարձրացում

Հիմնվելով առավել կենսունակ և շահութաբեր արժեքային շղթաների ընտրության վրա՝ IADAAM ծրագիրը ճանապարհ է հարթում տնտեսական աճի և Արարատի ու Արմավիրի գյուղատնտեսական ոլորտի մրցունակության բարձրացման համար։ Այն նպատակ ունի ստեղծել երկարաժամկետ, կայուն զարգացման ուղիներ՝ ապահովելով ֆերմերների և ագրոբիզնեսի կայունությունն ու բարգավաճումը:

«Ոռոգվող գյուղատնտեսության զարգացումը Արարատի և Արմավիրի մարզերում» (IADAAM) ծրագիրը, որը ֆինանսավորվում է Եվրոպական միության միջոցով (ԵՄ), Զարգացման ֆրանսիական գործակալության (ԶՖԳ) իրականացմամբ, համապարփակ նախաձեռնություն է, որի նպատակն է վերափոխել ոռոգվող գյուղատնտեսությունը Հայաստանում։

Ծրագրում տեխնիկական աջակցության բաղադրիչն իրականացվում է «Ագրո քընսալթինգ Եվրոփ»-ի, «Ավենյու քընսալթինգ գրուպ» ՍՊԸ, «Ռազմավարական զարգացման գործակալություն» ՀԿ-ի և «3 ԱՐ Ստրատեգիա» ՍՊԸ մասնակցությամբ կոնսորցիումի կողմից։