«Փախստականների սոցիալ-տնտեսական ինտեգրումը Հայաստանում» SEIRA ծրագրի շրջանակներում հունվարի 13-ին ծրագրի ղեկավար Վահե Հովհաննիսյանը հանդիպեց Սյունիքի մարզպետ Ռոբերտ Ղուկասյանին։ Հանդիպմանը մասնակցում էին Կապանում ՄԱԿ-ի պարենի համաշխարհային ծրագրի պատասխանատու Լուսինե Սարուխանյանը, մարզպետարանի աշխատակիցներ։

Հանդիպմանը Վահե Հովհաննիսյանը ներկայացրեց իրականացվող ծրագրի նպատակը, հիմնական ուղղվածությունը, ինչպես նաև ծրագրային այլ մանրամասներ, որով նախատեսվում է բարելավել և ընդլայնել Լեռնային Ղարաբաղից տեղահանված և տեղացի խոցելի բնակչության կարողությունները՝ զուտ մարդասիրական մոտեցումից դեպի երկարաժամկետ զարգացմանն անցում կատարելու համար։

Մարզպետը շնորհակալություն հայտնեց Ռազմավարական զարգացման գործակալությանը մարզում երկար տարիների աշխատանքի համար և հաստատեց համագործակցությունը շարունակելու իր պատրաստակամությունը։ Դրան հաջորդեց կողմերի միջև պայմանավորվածություն ձեռք բերելու և հետագա քայլերի ձեռնարկման վերաբերյալ քննարկումը։

SEIRA ծրագիրը՝ թիրախավորելով Գեղարքունիքի, Վայոց Ձորի և Սյունիքի մարզերը, ուղղված է Հայաստանում փախստականների և տեղացի խոցելի բնակչության կենսաապահովմանը և ճկունության բարձրացմանը։

 «Փախստականների սոցիալ-տնտեսական ինտեգրումը Հայաստանում» (SEIRA) ծրագիրը ֆինանսավորվում է Շվեյցարիայի զարգացման և համագործակցության գործակալության կողմից և իրականացվում է «Ռազմավարական զարգացման գործակալություն» ՀԿ-ի և ՄԱԿ-ի Պարենի համաշխարհային ծրագրի կողմից։

«Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակներում «Ռազմավարական զարգացման գործակալություն» (ՌԶԳ) ՀԿ-ն ՀՀ ԿԳՄՍ նախարարության հետ համագործակցությամբ դեկտեմբերի 19-20-ին Դիլիջանում կազմակերպեց Շահագրգիռ կողմերի երկխոսության հարթակի հերթական հանդիպումը:

Հանդիպմանը մասնակցեցին ՀՀ ԿԳՄՍ նախարարի տեղակալ Արաքսիա Սվաջյանը, նախարարության նախնական (արհեստագործական) և միջին մասնագիտական կրթության վարչության պետ Արմենուհի Պողոսյանը, Շվեյցարիայի զարգացման և համագործակցության գործակալության տնտեսական զարգացման ծրագրերի ղեկավար Արթուր Փոքրիկյանը, ՌԶԳ նախագահ Մկրտիչ Այվազյանը, ՄԿՈՒ ոլորտու ծրագրեր իրականացնողներ և ծրագրի սոցիալական գործընկերներ:

Ողջունելով հանդիպման մասնակիցներին՝ Մկրտիչ Այվազյանն իր խոսքում ընդգծեց շահագրգիռ կողմերի պարբերաբար հանդիպումների կարևորությունը երկխոսության և քննարկումների միջոցով ՄԿՈՒ ոլորտում առկա խնդիրների վերհանման, տարվող աշխատանքների վերաբերյալ միմիանց իրազեկման, ինչպես նաև հարթակի համակարգման ու ընդլայնման տեսանկյունից:

ՀՀ ԿԳՄՍ նախարարի տեղակալ Արաքսիա Սվաջյանը ներկայացրեց պետական ռազմավարությունն ու բարեփոխումները ՄԿՈՒ ոլորտում, մասնավորապես՝ օրենսդրության կատարելագործման, ոլորտային կառույցների արդիականացման ուղղությամբ: Արաքսիա Սվաջյանն ընդգծեց ուսուցանվող մասնագիտությունների գրավչության բարձրացման, հաստատությունների որակյալ կառավարման և երիտասարդներին դեպի ՄԿՈՒ ուղղորդման անհրաժեշտությունը: Այս համատեքստում նախարարի տեղակալը կարևորեց ՄԱՎԵՏԱ ծրագրով գյուղատնտեսական մի շարք մասնագիտությունների դուալ ուսուցմամբ ներդնելու փորձը:

Շվեյցարիայի զարգացման և համագործակցության գործակալության տնտեսական զարգացման ծրագրերի ղեկավար Արթուր Փոքրիկյանն ընդգծեց միջազգային առաջատար փորձի ներդնումը Հայաստանում ՄԿՈՒ ոլորտի արդիականացման ուղղությամբ և այս համատեքստում պետական կառույցների, տեղական և միջազգային կազմակերպությունների ջանքերի համադրումը:

ՀՀ ԿԳՄՍ նախարարության վարչության պետ Արմենուհի Պողոսյանը ներկայացրեց ՄԿՈՒ ոլորտում առկա իրավիճակը, նոր օրենքով ու ենթաօրենսդրական ակտերով կարգավորումները, խնդիրներն ու մարտահրավերները, որոնց բախվում են բարեփոխումների ընթացքում և պետական մոտեցումները ՄԿՈՒ հաստատությունների  արդիականացման  և աշխատաշուկայի պահանջներին համապատասխան որակյալ մասնագետների պատրաստման ուղղությամբ:

ՄԱՎԵՏԱ ծրագրի ղեկավար Լիլիթ Հովհաննիսյանը ներկայացրեց  դուալ ուսուցմամբ մասնագիտությունների, ուսումնական հաստատություն-գործատու համագործակցության փորձը և ծրագրային ձեռքբերումները:

Հանդիպման երկրորդ մասը նվիրված էր երկխոսության հարթակի աշխատանքների հետագա համակարգման, ղեկավարման և ընդլայնման հնարավորությունների քննարկմանը:

Երկրորդ օրվա ընթացքում հանդիպմանը ներկա միությունները և ասոցիացիաները ներկայացրեցին մասնավորի և հենց իրենց դերը և կարևորությունը ՄԿՈՒ-ում::

ՄԱՎԵՏԱ ծրագիրը ֆինանսավորվում է միջազգային և տեղական կազմակերպությունների լայն կոալիցիայի կողմից՝ Շվեյցարիայի զարգացման և համագործակցության գործակալության (SDC) գլխավորությամբ, ներառյալ Ավստրիական զարգացման գործակալությունը (ADA), Գերմանիայի տնտեսական համագործակցության և զարգացման նախարարությունը (BMZ), Հայաստանի կառավարությունը, Շվեյցարիայի եկեղեցու օգնություն (HEKS/EPER) ՀԿ-ն, Իզմիրլյան հիմնադրամը, Ռազմավարական զարգացման գործակալություն (ՌԶԳ) ՀԿ-ն և «Վանանդ Ագրո» ՓԲԸ-ն:

Ծրագիրն իրականացնող գործընկերներն են Գերմանական միջազգային համագործակցության ընկերությունը (GIZ) և Շվեյցարիայի եկեղեցու օգնություն (HEKS/EPER) ՀԿ-ն՝ ՌԶԳ-ի և Բեռնի Կիրառական գիտությունների համալսարանի (HAFL) գյուղատնտեսական, անտառային և պարենային գիտությունների դպրոցի ներգրավմամբ: