«Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակներում փետրվարի 25-26-ը Դիլիջանում տեղի ունեցավ «MAVETAtalks․ կանայք ՄԿՈՒ և գյուղատնտեսության ոլորտում» խորագրով երկօրյա միջոցառում, որին մասնակցեցին ծրագրի գործընկեր Ստեփանավանի գյուղատնտեսական և Բերդի բազմագործառութային պետական քոլեջների ուսանողներ ու դասավանդողներ, աշակերտներ և մասնավոր հատվածի գործընկերներ։

Միջոցառման նպատակն էր բարձրացնել Լոռու և Տավուշի մարզերի դպրոցների աշակերտների հետաքրքրությունը գյուղատնտեսական մասնագիտությունների նկատմամբ և ցուցադրել ոլորտի առավելություններն ու մասնագետների պահանջարկը։

ՄԱՎԵՏԱ ծրագրի ՄԿՈՒ խորհրդատու Լիլիթ Բեգլարյանը ներկայացրեց ծրագրով ներդրված դուալ ուսուցմամբ մասնագիտություններն ու արդեն իսկ արձանագրված հաջողությունները։

HEKS/EPER կազմակերպության ՄԿՈՒ ավագ խորհրդատու Մոնիկ Ֆրեյերն ողջույնի իր խոսքում  անդրադարձավ ոլորտում առկա հիմնախնդիրներին,  լավագույն միջազգային՝ շվեյցարական փորձին, այն Հայաստանում ինտեգրելու և տեղայնացնելու ջանքերին։

MAVETAtalks ձևաչափով ելույթների միջոցով ՄԿՈՒ  և մասնավոր հատվածի ներկայացուցիչները խոսեցին իրենց փորձի ու հաջողությունների մասին, հղեցին մոտիվացիոն ուղերձներ։

Միջոցառման երկրորդ մասում՝ «Գենդերային հավասարությունը ՄԿՈՒ ոլորտում․ գյուղատնտեսության մեջ արգելքների հաղթահարում և հնարավորությունների ստեղծում» խորագրով պանելային քննարկման ընթացքում «Ռազմավարական զարգացման գործակալություն» ՀԿ-ի գենդերային հավասարության մասնագետ Մարիամ Մելիքյանը ներկայացրեց գենդերային հավասարության և սոցիալական ներառականության վերաբերյալ  հայաստանյան վիճակագրությունը՝ համեմատություններ անելով միջազգային փորձի հետ։

Այնուհետև մասնակիցները քննարկեցին գյուղատնտեսական մասնագիտությունների և ոլորտում գոյություն ունեցող գենդերային կարծրատիպերը, խնդիրները և գենդերազգայուն մոտեցումների որդեգրման անհրաժեշտությունը։

Դերային խաղի միջոցով դպրոցականները հնարավորություն ունեցան արտահայտելու գյուղատնտեսական մասնագիտությունների մասին իրենց կարծիքն ու պատկերացումները ոլորտի վերաբերյալ։

ՄԱՎԵՏԱ ծրագիրը ֆինանսավորվում է միջազգային և տեղական կազմակերպությունների լայն կոալիցիայի կողմից՝ Շվեյցարիայի զարգացման և համագործակցության գործակալության (SDC) գլխավորությամբ, ներառյալ Ավստրիական զարգացման գործակալությունը (ADA), Գերմանիայի տնտեսական համագործակցության և զարգացման նախարարությունը (BMZ), Հայաստանի կառավարությունը, Շվեյցարիայի եկեղեցու օգնություն (HEKS/EPER) ՀԿ-ն, Իզմիրլյան հիմնադրամը, Ռազմավարական զարգացման գործակալություն (ՌԶԳ) ՀԿ-ն և «Վանանդ Ագրո» ՓԲԸ-ն:

Ծրագիրն իրականացնող գործընկերներն են Գերմանական միջազգային համագործակցության ընկերությունը (GIZ) և Շվեյցարիայի եկեղեցու օգնություն (HEKS/EPER) ՀԿ-ն՝ ՌԶԳ-ի և Բեռնի Կիրառական գիտությունների համալսարանի (HAFL) գյուղատնտեսական, անտառային և պարենային գիտությունների դպրոցի ներգրավմամբ:

«Ոռոգվող գյուղատնտեսության զարգացումը Արարատի և Արմավիրի մարզերում» (IADAAM) ծրագրի շրջանակներում ս.թ. փետրվարի 20-ին տեղի ունեցավ «Կարիքների գնահատման հարցաթերթի հրահանգավորում» թեմայով դասընթաց, որը վարեց ՌԶԳ ծրագրերի մշտադիտարկման և գնահատման պատասխանատու Աննա Սարգսյանը

Սույն դասընթացը միտված էր IADAAM ծրագրի շրջանակում նախատեսված գյուղաջակցության ծառայություններ ստացող ֆերմերների կարիքների գնահատման գործընթացի դյուրացմանը և արդիականացմանը։ Այդ նպատակով ՌԶԳ ծրագրերի մշտադիտարկման և գնահատման պատասխանատու Աննա Սարգսյանի կողմից մշակվել և թվայնացվել է հարցաթերթ (երկլեզու՝ հայերեն և անգլերեն լեզուների ընտրության հնարավորությամբ), որը կօգտագործվի KoBoToolbox շարժական տվյալների հավաքագրման գործիքի միջոցով։ Հարցումները կիրականացվեն դեմ առ դեմ, օգտագործելով նոթբուք կամ պլանշետ։

Դասընթացի նպատակն էր վերապատրաստել դաշտային թիմի անդամներին և հարցազրուցավարներին` IADAAM ծրագրի գյուղաջակցության խորհրդատվական ծառայության համակարգողներին և փորձագետներին՝ թվային գործիքի (KoBoToolbox) կիրառմամբ ֆերմերների շրջանում հարցումներ իրականացնելու համար։  Այս դասընթացը կօգնի մասնակիցներին մշակված թվային գործիքի միջոցով ճշգրիտ և արդյունավետ կերպով իրականացնել ֆերմերների կարիքների գնահատում։

🌱«Ոռոգվող գյուղատնտեսության զարգացումը Արարատի և Արմավիրի մարզերում» (IADAAM) ծրագիրը, որը ֆինանսավորվում է Եվրոպական միության միջոցով (ԵՄ), Զարգացման ֆրանսիական գործակալության (ԶՖԳ) իրականացմամբ, համապարփակ նախաձեռնություն է, որի նպատակն է վերափոխել ոռոգվող գյուղատնտեսությունը Հայաստանում։

Ծրագրում տեխնիկական աջակցության բաղադրիչն իրականացվում է «Ագրո քընսալթինգ Եվրոփ»-ի, «Ավենյու քընսալթինգ գրուպ» ՍՊԸ, «Ռազմավարական զարգացման գործակալություն» ՀԿ-ի և «3 ԱՐ Ստրատեգիա» ՍՊԸ մասնակցությամբ կոնսորցիումի կողմից։