2025 թվականի հունիսի 7-ին և 8-ին «Ոռոգվող գյուղատնտեսության զարգացումը Արարատի և Արմավիրի մարզերում» (IADAAM) ծրագրի շրջանակներում հաջողությամբ անցկացվեցին երկու թեմատիկ ինտենսիվ դասընթացներ, որոնք նախատեսված էին ՀՀ Էկոնոմիկայի նախարարության գյուղատնտեսական վարչությունների անձնակազմի համար` նպաստելու նրանց առաջնորդման, հաղորդակցման և բանակցային հմտությունների զարգացմանը՝ ինչպես անհատական, այնպես էլ թիմային մակարդակով։

Դասընթացները վարեց քաղաքական գիտությունների թեկնածու Մագդա Արսենյանը, ում փորձառու և մասնագիտացված մոտեցումը նպաստեց մասնակցիների ներգրավվածության բարձր մակարդակին և դասընթացների նպատակների արդյունավետ իրագործմանը։

Հունիսի 7-ին անցկացվեց «Առաջնորդություն հանրային կառավարման համակարգում. ինքնաճանաչումից մինչև ճգնաժամերի արդյունավետ կառավարում» դասընթացը, որի շրջանակում մասնակիցները համակողմանիորեն ուսումնասիրեցին հանրային կառավարման ոլորտում առաջնորդության հիմնարար սկզբունքները, սոցիալ-հոգեբանական գործոնների դերը կառավարման գործընթացներում, ինչպես նաև ճգնաժամային իրավիճակների կանխարգելման և արդյունավետ արձագանքման ռազմավարությունները։

Հունիսի 8-ին կայացավ «Հաղորդակցություն, բանակցություններ և կոնֆլիկտների կարգավորում» թեմայով դասընթացը, որի ընթացքում շեշտադրվեցին արդյունավետ հաղորդակցության մեխանիզմները՝ հաղորդակցման եղանակների, ռազմավարական պլանավորման, թվային և հեռավար հաղորդակցման, ակտիվ ունկնդրման, հանրային խոսքի և հետադարձ կապի թեմաներ՝ տեսական ու գործնական բաղադրիչներով։ Միաժամանակ, սույն դասընթացի շրջանակներում մասնակիցները կծանոթանան բանակցային տարբեր մոդելների, կոնֆլիկտների կարգավորման ռազմավարություններին և համոզման տեխնիկաներին։

«Ոռոգվող գյուղատնտեսության զարգացումը Արարատի և Արմավիրի մարզերում» (IADAAM) ծրագիրը, որը ֆինանսավորվում է Եվրոպական միության միջոցով (ԵՄ), Զարգացման ֆրանսիական գործակալության (ԶՖԳ) իրականացմամբ, համապարփակ նախաձեռնություն է, որի նպատակն է վերափոխել ոռոգվող գյուղատնտեսությունը Հայաստանում։

IADAAM ծրագրում տեխնիկական աջակցության բաղադրիչն իրականացվում է «Ագրո քընսալթինգ Եվրոփ»-ի գլխավորած «Ավենյու քընսալթինգ գրուպ»-ի, «Ռազմավարական զարգացման գործակալություն» ՀԿ-ի և «3 ԱՐ Ստրատեգիա» ՍՊԸ մասնակցությամբ կոնսորցիումի կողմից, որը հանդես է գալիս որպես ծրագրի օպերատոր՝ նպատակ ունենալով ինստիտուցիոնալ աջակցություն տրամադրել ՀՀ էկոնոմիկայի նախարարությանը՝ թիրախային ոլորտներում գյուղատնտեսական քաղաքականության և բարեփոխումների մշակման գործում։

Հունիսի 3-ին Լոռու մարզի Դեբեդ գյուղի ՔՕԱՖ կենտրոնում տեղի ունեցավ «Հայաստանի կենդանի լանդշաֆտները շուկայի զարգացման համար»  (ԼԻԼԱ) ծրագրի ղեկավար կազմի և շահառուների հերթական հանդիպումը։

Մասնակիցներին ողջունեց և ծրագրի ընթացիկ արդյունքներն ամփոփեց WWF-Հայաստանի տնօրեն Լևոն Աղասյանը։

Այնուհետև «Ռազմավարական զարգացման գործակալություն» ՀԿ-ի ծրագրի համակարգող Ալլա Ղազարյանը ներկայացրեց առաջին բաղադրիչի ընթացիկ արդյունքները՝ ընդգծելով կայուն և ներառական տուրիզմի զարգացման, տեղական բիզնեսների կենսապայմանների ու ենթակառուցվածքների բերելավման, ինչպես նաև տուրիզմի և հյուրընկալության ոլորտի աշխատակիցների հմտությունների և կարողությունների զարգացման ուղղությամբ իրականացված քայլերը։ Ալլա Ղազարյանը նշեց նաև միջազգային գործընկերների հետ իրականացված փորձի փոխանակման այցերի, ինչպես նաև թիրախային բնակավայրերի հետ ծրագրի համագործակցության մասին։

WWF-Հայաստան ծրագրի համակարգող Նաիրե Երիցյանը ներկայացրեց երկրորդ բաղադրիչի ընթացիկ արդյունքները՝ շեշտադրելով բնապահպանության ուղղությամբ իրականացված աշխատանքները, այդ թվում՝ բնական պաշարների  կայուն օգտագործման, կլիմայի փոփոխության մեղմման ու հարմարվողականության բարձրացման ուղղությամբ։

Ծրագրի ազդեցության վերաբերյալ ելույթներով հանդես եկան  «Էկոլուր» տեղեկատվական ՀԿ-ի փոխնախագահ Վիկտորյա Բուռնազյանը, ծրագրի շահառուներ, համայնքների ղեկավարներ։

ԼԻԼԱ ծրագիրը ֆինանսավորվում է Շվեյցարիայի զարգացման և համագործակցության գործակալության (SDC) կողմից և իրականացվում Բնության համաշխարհային հիմնադրամի հայաստանյան մասնաճյուղի կողմից (WWF-Հայաստան)՝ «Ռազմավարական զարգացման գործակալություն» (ՌԶԳ) ՀԿ-ի հետ համատեղ: