Սույն թվականի նոյեմբերի 27-ից դեկտեմբերի 4-ը «Հայաստանում գյուղատնտեսության ոլորտում մասնագիտական կրթության և ուսուցման արդիականացում (MAVETA)» ծրագրի շրջանակում «Ռազմավարական զարգացման գործակալություն» ՀԿ-ի և Բեռնի կիրառական գիտությունների համալսարանի գյուղատնտեսության, անտառային ու պարենային գիտությունների դպրոցի կողմից կազմակերպվեց գործընկեր ՄԿՈՒ հաստատությունների  տնօրենների ու մասնավոր հատվածի ներկայացուցիչների համար մեկշաբաթյա ուսումնական այց Շվեյցարիայի Դաշնություն:

Այցի նպատակն էր ծանոթանալ Շվեյցարիայի ՄԿՈՒ դուալ կրթական համակարգին և ուսումնական ծրագրերի մշակման գործընթացին: Մանակիցները հնարավորություն ունեցան այցելել տարբեր ուսումնական հաստատություններ և հյուրընկալող ընկերություններ, տեղում ծանոթանալ դուալ ՄԿՈՒ կրթական համակարգով իրականացվող հյուրընկալող ընկերությունների դերին և աշկերտության կարևորությանը, ինչպես նաև իմանալ ֆերմաներում ուսուցման հնարավորությունների և սահմանափակումների մասին: Մասնակիցները իրենց գոհունակությունը հայտնեցին բազմաբնույթ այցերի և ձեռք բերված տեղեկատվության համար: Մասնակիցները քննարկեցին և զուգահեռներ անցկացրեցին Հայաստանի ՄԿՈՒ կրթական համակարգի և Շվեյցարիայի դուալ ՄԿՈՒ-ի  միջև:

Այցի արդյունքում MAVETA ծրագրի շրջանակներում կվերանայվեն և կներդրվեն անասնաբուժություն, կաթի և կաթնամթերքի տեխնոլոգիա, ֆերմերային գործ, գյուղատնտեսական մեքենաներ, կաթնաֆերմայի կառավարում, պտղատու այգիների այգեգործություն/ընկույզի և մրգերի մշակում մասնագիտությունների կրթական ծրագրերը՝ համահունչ դարձնելով դուալ կրթության մոտեցման սկզբունքներին և գործատուների կողմից ներկայացվող պահանջարկին:

Ծրագիրը ֆինանսավորվում է միջազգային և տեղական կազմակերպությունների լայն կոալիցիայի կողմից՝ Շվեյցարիայի զարգացման և համագործակցության գործակալության (SDC) գլխավորությամբ, ներառյալ Ավստրիական զարգացման գործակալությունը (ADA), Գերմանիայի տնտեսական համագործակցության և զարգացման նախարարությունը (BMZ), Հայաստանի կառավարությունը, Շվեյցարիայի եկեղեցու օգնություն (HEKS/EPER) ՀԿ-ն, Իզմիրլյան հիմնադրամը, «Ռազմավարական զարգացման գործակալություն» (ՌԶԳ) ՀԿ-ն և «Վանանդ Ագրո» ՓԲԸ-ն:

Անասնաբուժների և արհեստական սերմնավորման տեխնիկների մասնագիտական գիտելիքները և հմտությունները բարելավելու նպատակով սույն թվականի նոյեմբերի 2-4-ը, «Ռազմավարական զարգացման գործակալություն» հասարակական կազմակերպության կողմից իրականացվող «Անասնապահության զարգացում Հայաստանում՝ հարավ–հյուսիս 2» ծրագրի շրջանակներում անցկացվեց «Տավարաբուծություն և ԽԵԿ-ի ցեղային հատկանիշները բարելավելու ուղիները» թեմայով վերապատրաստման դասընթաց, որին մասնակցեցին ծրագրի թիրախային Շիրակի, Գեղարքունիքի և Սյունիքի մարզերից 32 անասնաբույժ և արհեստական սերմնավորման տեխնիկ:

Դասընթացն անցկացվել է ակտիվ քննարկումների, հարց ու պատասխանների և խմբային աշխատանքների ձևաչափով, որի ժամանակ մասնակիցները ստացել են տավարաբուծության վերաբերյալ համապարփակ գիտելիքներ։ Հրավիրյալ դասընթացավարը ներկայացրել է երկրում ԽԵԿ-ի բուծման ու կենդանիների գնահատման առանձնահատկությունները, բուծման մեթոդները և արհեստական սերմնավորման նշանակությունը նախրի ցեղային հատկանիշները բարելավելու համար։

Դասընթացի ավարտից հետո մասնակիցները հնարավորություն ունեցան ծանոթանալ անասնաբուժական նշանակության դեղորայքի և գործիքների, գյուղատնտեսական նշանակության միջոցների վաճառքով, ինչպես նաև մասնավոր անասնաբուժական և կենդանիների արհեստական սերմնավորման ծառայություններ մատուցող  «Ֆերմեր 6» ՍՊԸ-ի գործունեության հետ։

Հանդիպման ընթացքում մասնակիցներին հնարավորություն ընձեռնվեց գործնական կապեր ստեղծել մատակարարի հետ, որը կարող է մատակարարել անհրաժեշտ միջոցները հեռավոր բնակավայրեր և ապահովել մասնագետների կայուն շարունակական աշխատանքը։