2023 թվականի նոյեմբերի 8-ին «Ռազմավարական զարգացման գործակալություն» ՀԿ-ն «Ոլորտների թվայնացում հանուն մրցունակության» RECONOMY նախագծի շրջանակներում կազմակերպել էր օնլայն հանդիպում-քննարկում մոլդովական «EuroAlun» ընկերության և ՀՀ գյուղատնտեսության ոլորտում գործող մի շարք առանցքային ընկերությունների և մասնագիտական կազմակերպությունների մասնակցությամբ։

Հանդիպումը նպատակ ուներ ներկայացնել «EuroAlun»  ընկերության թվային լուծումը՝ «iFarms» բջջային հավելվածը, բացահայտել հետաքրքրություններն ու հետագա համագործակցության հնարավոր քայլերը։ iFarms հավելվածը նախագծված է բարձրացնելու գյուղատնտեսական գործառնությունների ճշգրտությունն ու արդյունավետությունը՝ հնարավորություն տալով հավաքագրել և մշակել հիմնական դաշտային տվյալները` արբանյակային դիտարկումների և տարբեր սենսորային սարքավորումների միջոցով, որոնք հետագայում կարող են օգտագործվել ճշգրիտ գյուղատնտեսական պլանավորման համար:

RECONOMY-ը Շվեդիայի միջազգային զարգացման համագործակցության գործակալության (Sida) տարածաշրջանային ներառական և կանաչ տնտեսական զարգացման ծրագիր է, որն իրականացվում է HELVETAS Swiss Intercooperation-ի կողմից՝ «Ռազմավարական զարգացման գործակալություն» ՀԿ-ի և Արևելյան Գործընկերության և Արևմտյան Բալկանների տարածաշրջաններում այլ կազմակերպությունների հետ համագործակցությամբ:

Ս․թ․ hոկտեմբերի 27-28-ին ՀՀ Էկոնոմիկայի նախարարության, «Ռազմավարական զարգացման գործակալություն» (ՌԶԳ) ՀԿ-ի կողմից իրականացվող «Անասնապահության զարգացում Հայաստանում՝ հարավ-հյուսիս 2» և «Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրերի աջակցությամբ կազմակերպվեց դասընթաց՝ «Տոհմային գործի վարում» թեմայով:

Միջոցառման նպատակն էր՝ բարձրարժեք տոհմային կենդանիներ ունեցող ֆերմերներին ներկայացնել սկզբնական անասնաբուծական հաշվառման ձևաչափը և տոհմային հաշվառման սկզբունքները, ինչպես նաև անասնաբուծության ոլորտում իրականացվող պետական աջակցության ծրագրերն ու դրանցից օգտվելու կարգը:

Դասընթացին մասնակցում էին ՀՀ Սյունիքի, Լոռու, Տավուշի, Գեղարքունիքի և Շիրակի խոշոր անասնապահ ֆերմերային տնտեսությունների ներկայացուցիչներ:

Դասընթացը մեկնարկեց ՀՀ Էկոնոմիկայի նախարարի տեղակալ տիկին Աշխեն Շիրվանյանի  ողջույնի խոսքով, ով շնորհակալություն հայտնեց մասնակիցներին և «Ռազմավարական զարգացման գործակալություն» ՀԿ-ին անասնապահության ոլորտի հետ առնչվող նախաձեռնություններին աջակցելու համար: Տիկին Շիրվանյանը խոսեց դասընթացի անհրաժեշտության մասին և հույս հայտնեց, որ այս դասընթացը կնպաստի Հայաստանում տոհմային կենդանիների քանակի ավելացմանը:

Ողջույնի խոսքով հանդես եկավ նաև «Ռազմավարական զարգացման գործակալություն» ՀԿ-ի նախագահ Մկրտիչ Այվազյանը, ով նշեց, որ կազմակերպությունը միշտ տեսադաշտում է պահել անասնապահության հետ կապված խնդիրները և աջակցել դրանց լուծմանը:

«Այսօր հրամայական է միավորել մասնավոր, պետական և միջազգային ծրագրերի բոլոր ռեսուրսները՝ հանուն ոլորտի և մեր պետության զարգացման»,-ասաց պարոն Այվազյանը:

Դասընթացի առաջին օրը ՀՀ Էկոնոմիկայի նախարարության փորձագետ Աշոտ Հովհաննիսյանի կողմից մասնակիցներին ներկայացվեց սկզբնական անասնաբուծական հաշվառման և տոհմային քարտերի վարման ձևաչափը։

ՀՀ Էկոնոմիկայի նախարարության Անասնաբուծության վարչության գյուղատնտեսական կենդանիների բուծման բաժնի պետ՝ Տաթևիկ Սարգսյանը մասնակիցներին ներկայացրեց անասնաբուծության ոլորտում իրականացվող պետական աջակցության ծրագրերն ու դրանց դիմելու կարգը։

Երկօրյա դասընթացի ընթացքում անդրադարձ կատարվեց նաև գյուղատնտեսության ոլորտում կանանց ներգրավվածության կարևորությանը և ոլորտի զարգացման համար վերջիններիս դերակատարության խթանմանը։ Դասընթացն անցավ ակտիվ քննարկման մթնոլորտում։