2024թ. հունվարի 29-ից փետրվարի 7-ը «Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակներում «Ռազմավարական զարգացման գործակալություն» (ՌԶԿ) ՀԿ-ն «Կաթնարդյունաբերության ոլորտի ձեռնարկություններում լաբորատորիայի մասնագետի կարճաժամկետ վերապատրաստում» թեմայով դասընթաց է կազմակերպել ՄԱՎԵՏԱ-ի գործընկեր մասնավոր հատվածի լաբորատորիայի աշխատակիցների և Գորիսի ու Ստեփանավանի պետական գյուղատնտեսական քոլեջներում կաթի և կաթնամթերքի տեխնոլոգիա առարկան դասավանդողների համար։

6-օրյա վերապատրաստման դասընթացն ու գործնական պարապմունքներն իրականացրել է «ՍՏԱՆԴԱՐՏ ԴԻԱԼՈԳ» ՍՊ ընկերությունը, որի ուսումնական կենտրոնը հագեցած է եվրոպական չափորոշիչներին համապատասխան լաբորատորիաներով։

Դասընթացի մասնակիցներն ուսումնական կենտրոնի ղեկավար Հայկուշ Բատիկյանի գլխավորությամբ գիտելիք և հմտություն են ստացել կաթի նմուշառման, դրա ընթացակարգերի, գործիքների ու միջոցների, գնահատման, ֆիզիկաքիմիական և մանրէաբանական ցուցանիշների որոշման, կաթի-կաթնամթերքի արտադրությունում վտանգների վերլուծության ու հսկման, կրիտիկական կետերի կառավարման համակարգի ներդրման և մասնագիտական այլ նրբությունների վերաբերյալ։

Նրանք նաև հնարավորություն են ունեցել ինքնուրույն փորձարկումներ իրականացնել լաբորատորիաներում։ Ուսումնական գործընթացն ավարտվեց թեստավորմամբ։ Թեստավորման դրական արդյունքներով բոլոր մասնակիցները ստացան հավաստագրեր։

Դասընթացի մասնակիցները մասնավոր հատված-քոլեջ համագործակցության շրջանակներում այս դասընթացը կանցկացնեն նաև մարզերում։

Ս.թ․ հունվարի 19-ին «Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակներում կազմակերպվեց կարիերայի կողմորոշման և մասնագիտության ուղղորդման այց՝ ՀՀ Արմավիրի մարզի, Էջմիածնի Երվանդ Օտյանի անվան թիվ 7 հիմնական դպրոց և Զվարթնոց թաղամասի Զորավար Անդրանիկի անվան թիվ 12 դպրոց։

Այցն անցկացվեց ՄԱՎԵՏԱ ծրագրի գործընկեր՝ Էջմիածնի արհեստագործական պետական ուսումնարանի հետ համատեղ։ Այցի ընթացքում ՄԱՎԵՏԱ ծրագրի ՄԿՈՒ խորհրդատու՝ Լիլիթ Բեգլարյանը ներկայացրեց ՄԱՎԵՏԱ ծրագիրը և դուալ ուսուցման առավելությունները։

Էջմիածնի արհեստագործական պետական ուսումնարանի դասավանդող՝ Գագիկ Վարդանյանը ներկայացրեց  ուսումնարանի հնարավորությունները, 2024-2025թթ ուսումնական տարուց դուալ համակարգով ներդրվող «Մրգի և ընկուզեղենի այգիներում աշխատող մասնագետ»  մասնագիտությունը և Հայաստանում՝ հատկապես Արմավիրի մարզում, այգեգործության զարգացման հեռանկարները։

Ուսումնարանի մասնավոր հատվածի գործընկեր «Վանանդ Ագրո» ՓԲԸ-ի ներկայացուցիչ՝ Հայկ Ստեփանյանը ներկայացրեց մասնագիտության նկատմամբ պահանջարկը, այգեգործի զբաղմունքի նկարագիրը ու իրենց ընկերությունում աշխատելու հնարավորությունները։

Երկու հանդիպումներին ներկա էին 90-ից ավելի աշակերտ, որոնք հանդես եկան իրենց հետաքրքրող հարցերով՝ ընդունելության կարգի և ներկայացված մասնագիտության ուսուցման տևողության վերաբերյալ։