«Ռազմավարական զարգացման գործակալություն» ՀԿ-ի կողմից իրականացվող RECONOMY-ի «Ոլորտների թվայնացում` հանուն մրցունակության» ծրագրի շրջանակներում ծրագրի շահառու Վրաստանի ագրոտուրիզմի տարածաշրջանային ասոցիացիան օգոստոսի 22-23-ը կազմակերպեց երկօրյա տեղեկատվական շրջայց Գուրիայի շրջանում՝ բացահայտելու վրացական ագրոտուրիզմի ներուժը:

Առաջին օրը խումբը այցելեց «Կոմլի», որտեղ նրանք ունեցան թեյի էքսկուրսիա և մնացին վրացական ավանդական «կասրի» ոճով նախագծված հյուրանոցում։

Երեկոյան տեղի ունեցավ Agrogate.World հարթակի շնորհանդեսը՝ տրամադրելով մանրամասն տեղեկատվություն, թե ինչպես է գործում հարթակը: Խմբում ընդգրկված էին ինֆլուենսերներ ողջ Վրաստանից, ինչպես նաև տեղի կին ձեռներեցներ:

Երկրորդ օրը մասնակիցներն այցելեցին «Դամբո էկո ճամբար», որտեղ ունեցան նավակով շրջագայություն գետում:

«Ռազմավարական զարգացման գործակալություն» (ՌԶԿ) ՀԿ-ի կողմից իրականացվող «Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակներում օգոստոսի 28-ին տեխնիկական աջակցություն տրամադրվեց ծրագրի գործընկեր Ստեփանավանի պետական գյուղատնտեսական քոլեջին։

Քոլեջի անձնակազմին և ուսանողներին, մասնավոր հատվածի գործընկերներին ողջույնի իր խոսքում ՄԱՎԵՏԱ ծրագրի ղեկավար Լիլիթ Հովհաննիսյանը ընդգծեց, որ ծրագիրը շարունակելու է օրակարգում պահել քոլեջների ինստիտուցիոնալ կարողությունների զարգացման և տեխնիկական վերազինման խնդիրները՝ ՄԿՈՒ-ն ու գյուղատնտեսական մասնագիտություններն ուսանողների համար ավելի գրավիչ դարձնելու համար։

ՀՀ ԿԳՄՍ նախարարության նախնական (արհեստագործական) և միջին մասնագիտական կրթության վարչության պետ Արմենուհի Պողոսյանը կարևորեց «Ռազմավարական զարգացման գործակալություն» ՀԿ-ի հետ համագործակցությունը և ՄԱՎԵՏԱ ծրագրի դերը դուալ մոտեցմամբ կրթական համակարգի ներդրման ու զարգացման գործում։

Ելույթներով հանդես եկան քոլեջի տնօրեն Արա Չոբանյանը, մասնավոր հատվածի գործընկերներ, ուսանողներ։

ՄԱՎԵՏԱ ծրագրի ղեկավար Լիլիթ Հովհաննիսյանը և Ստեփանավանի պետական գյուղատնտեսական քոլեջի տնօրեն Արա Չոբանյանը ստորագրեցին հանձնման-ընդունման ակտ, որին հաջորդեց տեխնիկայի հանձնման պաշտոնական արարողությունը։

ՄԱՎԵՏԱ ծրագիրը ֆինանսավորվում է միջազգային և տեղական կազմակերպությունների լայն կոալիցիայի կողմից՝ Շվեյցարիայի զարգացման և համագործակցության գործակալության (SDC) գլխավորությամբ, ներառյալ Ավստրիական զարգացման գործակալությունը (ADA), Գերմանիայի տնտեսական համագործակցության և զարգացման նախարարությունը (BMZ), Հայաստանի կառավարությունը, Շվեյցարիայի եկեղեցու օգնություն (HEKS/EPER) ՀԿ-ն, Իզմիրլյան հիմնադրամը, Ռազմավարական զարգացման գործակալություն (ՌԶԳ) ՀԿ-ն և «Վանանդ Ագրո» ՓԲԸ-ն:
Ծրագիրն իրականացնող գործընկերներն են Գերմանական զարգացման գործակալությունը (GIZ) և Շվեյցարիայի եկեղեցու օգնություն (HEKS/EPER) ՀԿ-ն՝ ՌԶԳ-ի և Բեռնի Կիրառական գիտությունների համալսարանի (HAFL) գյուղատնտեսական, անտառային և պարենային գիտությունների դպրոցի ներգրավմամբ: