«Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակներում Տաշիրի համայնքապետարանը՝ «Ռազմավարական զարգացման գործակալություն» (ՌԶԳ) ՀԿ-ի աջակցությամբ հոկտեմբերի 10-ին  կազմակերպեց Պանրի փառատոն։ Փառատոնի միջոցառումը համընկավ Տաշիր քաղաքի հիմնադրման 180-րդ տարեդարձին նվիրված տոնակատարության հետ։

Փառատոնը նպատակ ուներ խթանել պանրագործությունը՝ որպես զբաղվածություն ապահովող մասնագիտական կարևոր ուղղություն, հանրության լայն շերտերին իրազեկել ՄԱՎԵՏԱ ծրագրի գործընկեր պանիր և այլ կաթնամթերք արտադրողների գործունեության մասին,  Ստեփանավանի պետական գյուղատնտեսական քոլեջի ուսանողներին ծանոթացնել գործատուների և թափուր աշխատատեղերի հետ, երիտասարդների շրջանում խթանել կաթի և կաթնամթերքի տեխնոլոգիա մասնագիտությունը։

Առանձին տաղավարներով ներկայացվեցին տեղական տասներկու պանիր արտադրող, ինչպես նաև համայնքային այլ կազմակերպություններ։

Քաղաքի հրապարակում հավաքված տաշիրցիներին ու հյուրերին ողջունեցին Լոռու մարզպետի տեղակալ  Գոռ Ասրյանը, Տաշիր համայնքի ղեկավար Էդգար Արշակյանը, Գուգարաց թեմի առաջնորդ գերաշնորհ Տեր Հովնան եպիսկոպոս Հակոբյանը և այլ պաշտոնյաներ։

Միջոցառման ընթացքում կատարվեց պատմական ակնարկ, որին զուգահեռ՝ Տաշիր քաղաքի օրվա առթիվ, մարզպետի և համայնքապետի անունից պատվոգրեր հանձնվեցին քաղաքի զարգացման գործում ավանդ ունեցող անձանց։

Լոռու մարզում սոցիալ-տնտեսական գործունեության և ակտիվ համագործակցության համար շնորհակալագիրը մարզպետի անունից «Ռազմավարական զարգացման գործակալություն» ՀԿ նախագահ  Մկրտիչ Այվազյանին հանձնեց մարզպետի տեղակալ Գոռ Ասրյանը։

Այնուհետև փառատոնի այցելուները շրջայց կատարեցին տաղավարներով, ծանոթացան ներկայացված արտադրանքներին, համտեսեցին և գնեցին տեղական արտադրության ավանդական ու ոչ ավանդական պանրատեսակներ, դիտեցին պանրագործության ցուցադրական վարպետաց դասերը։

Միջոցառումն ուղեկցվեց գեղանկարչական, ձեռքի աշխատանքների և 3D մոդելավորման ցուցադրություններով, համերգային ծրագրով։ Կատարումներով հանդես եկան երգիչներ Սևակ Ամրոյանը և Սոնան, ինչպես նաև Տաշիրի մշակույթի տան սաների պարային խումբը և «Սասուն» պարային համույթը՝ ապահովելով ազգագրական երգ-պարը։

Հայաստանի ավտոմոբիլային ֆեդերացիան տոնական միջոցառմանը ներկայացրեց իր ռետրո մեքենաների հավաքածուն։

ՄԱՎԵՏԱ ծրագիրը ֆինանսավորվում է միջազգային և տեղական կազմակերպությունների լայն կոալիցիայի կողմից՝ Շվեյցարիայի զարգացման և համագործակցության գործակալության (SDC) գլխավորությամբ, ներառյալ Ավստրիական զարգացման գործակալությունը (ADA), Գերմանիայի տնտեսական համագործակցության և զարգացման նախարարությունը (BMZ), Հայաստանի կառավարությունը, Շվեյցարիայի եկեղեցու օգնություն (HEKS/EPER) ՀԿ-ն, Իզմիրլյան հիմնադրամը, Ռազմավարական զարգացման գործակալություն (ՌԶԳ) ՀԿ-ն և «Վանանդ Ագրո» ՓԲԸ-ն:

Ծրագիրն իրականացնող գործընկերներն են Գերմանական միջազգային համագործակցության ընկերությունը (GIZ) և Շվեյցարիայի եկեղեցու օգնություն (HEKS/EPER) ՀԿ-ն՝ ՌԶԳ-ի և Բեռնի Կիրառական գիտությունների համալսարանի (HAFL) գյուղատնտեսական, անտառային և պարենային գիտությունների դպրոցի ներգրավմամբ:

RECONOMY-ի «Ոլորտների թվայնացում հանուն մրցունակության» ծրագրի շրջանակներում «Ռազմավարական զարգացման գործակալություն» ՀԿ-ի և Տուրիզմի հայկական ֆեդերացիայի միջև սեպտեմբերի 26-ին կնքվեց համագործակցության հուշագիր։

Տուրիզմի հայկական ֆեդերացիայի նախագահ Մեխակ Ապրեսյանն իր խոսքում ընդգծեց «Ռազմավարական զարգացման գործակալություն» ՀԿ-ի հետ երկար տարիների համագործակցությունը և ֆեդերացիային ցուցաբերած աջակցության կարևորությունը։

«Ռազմավարական զարգացման գործակալություն» ՀԿ-ի նախագահ Մկրտիչ Այվազյանը հավաստիացրեց, որ կազմակերպությունը Հայաստանում զգոսաշրջության զարգացումը համարում է ռազմավարական ուղղություններից մեկը և կօժանդակի ոլորտի թվայնացմանն ուղղված ջանքերին։

Այնուհետև «Ոլորտների թվայնացում հանուն մրցունակության» ծրագրի ղեկավար Մհեր Սահակյանն ու Տուրիզմի հայկական ֆեդերացիայի նախագահ Մեխակ Ապրեսյանը քննարկեցին առաջիկա անելիքները և գործողությունների պլանը։

Ծրագրով նախատեսվում է զարգացնել Տուրիզմի հայկական ֆեդերացիայի կարողությունները՝ թիրախային խմբերին, մասնավորապես՝ կանանց, երիտասարդների ու խոցելի խմբերին, տրամադրելու ոչ ֆորմալ կրթություն զբոսաշրջության ոլորտում առկա թվային պրոդուկտների և ծառայությունների վերաբերյալ։

Որպես ծրագրի վերջնարդյունք ակնկալվում է զբոսաշրջության ոլորտում ունենալ թվային նորարական գիտելիքներով օժտված աշխատուժ՝ ընդլայնելով նրանց աշխատունակությունն ու եկամտի ստացման հնարավորությունները։

RECONOMY-ն Շվեդիայի միջազգային զարգացման համագործակցության գործակալության (Sida) ներառական և կանաչ տնտեսական զարգացման ծրագիր է, որն իրականացվում է Helvetas-ի կողմից՝ համագործակցելով «Ռազմավարական զարգացման գործակալություն” ՀԿ-ի և Արևելյան գործընկերության և Արևմտյան Բալկանյան երկրների այլ կազմակերպությունների հետ։