«Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրի շրջանակում Շվեյցարիայից ժամանած պանրագործ-խորհրդատու Հանս Կնուսելը hոկտեմբերի 25-26-ը այցելեց ծրագրի գործընկեր կաթ վերամշակող «Լոռվա Կաթ» և «Վիվա Կաթ» ընկերություններ։

Խորհրդատվությունների ընթացքում փորձագետը մանրամասն անդրադարձավ արտադրական գործընթացում օգտագործվող նյութերի, գործիքների, պանրի աղադրման ու հասունացման փուլերի վերաբերյալ ընկերությունների ներկայացուցիչների հարցերին ու բարձրացրած խնդիրներին։

Փորձագետի ու ծրագրի գործընկերների միջև հետագա կապ պահպանելու պայմանավորվածություն ձեռք բերվեց։

ՄԱՎԵՏԱ ծրագիրը ֆինանսավորվում է միջազգային և տեղական կազմակերպությունների լայն կոալիցիայի կողմից՝ Շվեյցարիայի զարգացման և համագործակցության գործակալության (SDC) գլխավորությամբ, ներառյալ Ավստրիական զարգացման գործակալությունը (ADA), Գերմանիայի տնտեսական համագործակցության և զարգացման նախարարությունը (BMZ), Հայաստանի կառավարությունը, Շվեյցարիայի եկեղեցու օգնություն (HEKS/EPER) ՀԿ-ն, Իզմիրլյան հիմնադրամը, Ռազմավարական զարգացման գործակալություն (ՌԶԳ) ՀԿ-ն և «Վանանդ Ագրո» ՓԲԸ-ն:

Ծրագիրն իրականացնող գործընկերներն են Գերմանական միջազգային համագործակցության ընկերությունը (GIZ) և Շվեյցարիայի եկեղեցու օգնություն (HEKS/EPER) ՀԿ-ն՝ ՌԶԳ-ի և Բեռնի Կիրառական գիտությունների համալսարանի (HAFL) գյուղատնտեսական, անտառային և պարենային գիտությունների դպրոցի ներգրավմամբ:

RECONOMY-ի «Ոլորտների թվայնացում հանուն մրցունակության» ծրագրի ղեկավար Մհեր Սահակյանը հոկտեմբերի 18-19-ը Ջերմուկում մասնակցեց Տուրիզմի հայկական ֆեդերացիայի հերթական ընդհանուր ժողովին։

Տուրիզմի հայկական ֆեդերացիայի նախագահ Մեխակ Ապրեսյանը հանդիպման մասնակիցներին ներկայացրեց Ֆեդերացիայի 2024-2029 թվականի ռազմավարությունը՝ ներառյալ տեսլականը, առաքելության, նպատակների ու դրանց իրականացման համար հասցեագրված խնդիրները։

Ռազմավարության քննարկմանը մասնակցեցին ՀՀ էկոնոմիկայի նախարարը, ՀՀ Վայոց Ձորի մարզպետը, Ջերմուկ համայնքի ղեկավարն ու Ջերմուկի գործարար համայնքը, ԱՄՆ ՄԶԳ-ն (USAID), Գերմանական միջազգային համագործակցության ընկերության (GIZ) և «Ռազմավարական զարգացման գործակալություն» ՀԿ-ի ներկայացուցիչները։

Տուրիզմի հայկական ֆեդերացիայի անդամները և գործընկերները հավանության արժանացրեցին ռազմավարությունը։

Մեխակ Ապրեսյանը վստահեցրեց, որ ֆեդերացիան կշարունակի իր առաքելությունը՝ համագործակցության հարթակ լինելով շահագրգիռ կողմերի համար՝ ի նպաստ Հայաստանում կայուն, պատասխանատու և համընդհանուր հասանելի զբոսաշրջության զարգացման, հայկական պատմամշակութային ժառանգության պահպանության, զարգացման և հանրահռչակման։

Մեխակ Ապրեսյանը շնորհակալություն հայտնեց նաև միջազգային զարգացման գործընկերներին ռազմավարության մշակմանը աջակցելու համար, ինչպես նաև ՌԶԳ-ի կողմից իրականացվող RECONOMY ծրագրին ռազմավարությամբ նախատեսված ինստիտուցիոնալ զարգացման և ոլորտի օրենսդրական կարգավորումների բարելավման ուղղությամբ արդյունավետ համագործակցության համար։

RECONOMY-ն Շվեդիայի միջազգային զարգացման համագործակցության գործակալության (Sida) ներառական և կանաչ տնտեսական զարգացման ծրագիր է, որն իրականացվում է Helvetas-ի կողմից՝ համագործակցելով «Ռազմավարական զարգացման գործակալություն» ՀԿ-ի և Արևելյան գործընկերության և Արևմտյան Բալկանյան երկրների այլ կազմակերպությունների հետ։