RECONOMY-ի «Ոլորտների թվայնացում հանուն մրցունակության» և «Հայաստանի կենդանի լանդշաֆտները շուկայի զարգացման համար» (ԼԻԼԱ) ծրագրերի շրջանակներում ապրիլի 23-ին Երևանում տեղի ունեցավ գիդ-էքսկուրսավարների և տուրօպերատորների աշխատանքային հանդիպում՝ փորձառության վրա հիմնված զբոսաշրջության զարգացման թեմայով։

Միջոցառման մասնակիցներին ողջունեցին և ծրագրային միջամտությունների մասին ներկայացրեցին RECONOMY-ի «Ոլորտների թվայնացում հանուն մրցունակության» ծրագրի ղեկավար Մհեր Սահակյանը և «Հայաստանի կենդանի լանդշաֆտները շուկայի զարգացման համար» (ԼԻԼԱ) ծրագրի համակարգող Ալլա Ղազարյանը։

Like Local թվային հարթակի հիմնադիր Գևորգ Բաբայանը ընդհանուր տեղեկություններ հաղորդեց հարթակի գործունեության, միջազգային փորձի փոխանակման, ինչպես նաև ներկայացրեց փորձառության վրա հիմնված զբոսաշրջային ծառայությունների մշակման և մատուցման կարևորությունը։

Առանձնակի ուշադրություն դարձվեց Հայաստանի համայնքներում ինքնատիպ կենցաղով ապրող ընտանիքներ ընդգրկելուն, որոնք կկարողանան հյուրընկալել զբոսաշրջիկներին՝ ներկայացնելով իրենց տարածաշրջաններին բնորոշ զբոսաշրջային առանձնահատկությունները:

RECONOMY-ն Շվեդիայի միջազգային զարգացման համագործակցության գործակալության (Sida) ներառական և կանաչ տնտեսական զարգացման ծրագիր է, որն իրականացվում է Helvetas-ի կողմից՝ համագործակցելով «Ռազմավարական զարգացման գործակալություն» ՀԿ-ի և Արևելյան գործընկերության և Արևմտյան Բալկանյան երկրների այլ կազմակերպությունների հետ։

ԼԻԼԱ ծրագիրը ֆինանսավորվում է Շվեյցարիայի զարգացման և համագործակցության գործակալության (SDC) կողմից և իրականացվում Բնության համաշխարհային  հիմնադրամի հայաստանյան մասնաճյուղի կողմից (WWF-Հայաստան)՝ «Ռազմավարական զարգացման գործակալություն» (ՌԶԳ) ՀԿ-ի հետ համատեղ:

«Հայաստանի կենդանի լանդշաֆտները շուկայի զարգացման համար» (LILA) ծրագրի շրջանակում ապրիլի 15-18-ը Վայոց Ձորի Արենի համայնքում տեղի ունեցավ «Սեդրակ Մամուլյանի խոհարարական գիտելիքները» խորագրով տեսական և գործնական դասընթաց՝ նախատեսված Լեռնային Ղարաբաղից բռնի տեղահանված անձանց համար։

Քառօրյա դասընթացին «Հայ խոհարարական ավանդույթների զարգացման և պահպանման» ՀԿ նախագահ Սեդրակ Մամուլյանը մասնակիցներին ներկայացրեց ազգային խոհանոցի ծագումնաբանությունը և մշակութային առանձնահատկությունները, խոհարարական հիմունքները, ինչպես նաև ազգային ճաշատեսակների պատրաստման համար կիրառվող համեմունքների ճանաչելիությունը և օգտագործման կարգը՝ առանձնակի կարևորություն տալով սննդի անվտանգությանը։

Տեսական գիտելիքներին հետևեց գործնական մասը, որի ժամանակ մասնակիցները՝ Սեդրակ Մամուլյանի և նրա օգնական Անյուտա Մաթևոսյանի ուղղորդմամբ պատրաստեցին ազգային խոհանոցի հայնտի ճաշատեսակներ։

Դասընթացը մասնակիցներին հնարավորություն ընձեռեց ծանոթանալ ազգային ճաշատեսակների պատրաստման ճիշտ տեխնիկային, տեխնոլոգիական գործընթացների վերահսկմանը, ինչպես նաև նպաստեց խոհարարական գիտելիքների, հմտությունների և կարողությունների զարգացմանը՝ գաստրոզբոսաշրջության ոլորտում հետագայում ընդգրկվելու համար։

Դասընթացի ավարտին մասնակիցներին հանձնվեցին հավաստագրեր։

ԼԻԼԱ ծրագիրը ֆինանսավորվում է Շվեյցարիայի զարգացման և համագործակցության գործակալության (SDC) կողմից և իրականացվում Բնության համաշխարհային հիմնադրամի հայաստանյան մասնաճյուղի կողմից (WWF-Հայաստան)՝ «Ռազմավարական զարգացման գործակալություն» (ՌԶԳ) ՀԿ-ի հետ համատեղ: