«Փախստականների սոցիալ-տնտեսական ինտեգրումը Հայաստանում» (SEIRA) ծրագրի և «Հայաստանում գյուղատնտեսության ոլորտում մասնագիտական կրթության և ուսուցման արդիականացում» (ՄԱՎԵՏԱ) ծրագրերի շրջանակներում ապրիլին Սյունիքի և Գեղարքունիքի մարզերում տեղի ունեցան մեղվապահության վերաբերյալ դասընթացներ՝ Լեռնային Ղարաբաղից տեղահանված և տեղացի խոցելի խմբերի համար։

Դասընթացը վարեց «Մեղվաբուծության դարբնոց գիտակրթական կենտրոնի» ներկայացուցիչ Տիգրան Սեդրակյանը։

«Մեղվապահություն, մեղրաքամի կազմակերպում» և «մեղվապահության հիմունքները, մեղրամթերքի արտադրություն, մարկետինգ» թեմաներով անկացվող դասընթացներին մասնակիցներին հնարավորություն ընձեռվեց գործնական և տեսական մեթոդաբանությամբ ծանոթանալ մասնագիտությանն առնչվող հիմունքներին։

Դասընթացի գործնական մասում այցելելով Գորիս համայնքի Շինուհայր բնակավայրում գտնվող մեղրի արտադրամաս՝ դասընթացավարը ներկայացրեց առկա սարքավորումների և տեխնիկայի արդյունավետ կիրառմամբ մեղրամթերքի արտադրողականության բարձրացմանը նպաստող քայլերը։

Երկու մարզերում դասընթացին մասնակցեցին շուրջ 40 անձիք։

Դասընթացի ավարտին մասնակիցներին հանձնվեցին հավաստագրեր։

«Փախստականների սոցիալ-տնտեսական ինտեգրումը Հայաստանում» (SEIRA) ծրագիրը խթանում է սոցիալ-տնտեսական ինտեգրումը՝ բարելավելով առողջ սննդի հասանելիությունը և ստեղծելով կայուն կենսապայմաններ գյուղատնտեսության զարգացման միջոցով՝ հզորացնելու փախստականներին և Հայաստանի ընդունող համայնքներին։

SEIRA ծրագիրը ֆինանսավորվում է Շվեյցարիայի զարգացման և համագործակցության գործակալության կողմից և իրականացվում է «Ռազմավարական զարգացման գործակալություն» ՀԿ-ի և ՄԱԿ-ի Պարենի համաշխարհային ծրագրի կողմից։

ՄԱՎԵՏԱ ծրագիրը ֆինանսավորվում է միջազգային և տեղական կազմակերպությունների լայն կոալիցիայի կողմից՝ Շվեյցարիայի զարգացման և համագործակցության գործակալության (SDC) գլխավորությամբ, ներառյալ Ավստրիական զարգացման գործակալությունը (ADA), Գերմանիայի տնտեսական համագործակցության և զարգացման նախարարությունը (BMZ), Հայաստանի կառավարությունը, HEKS/EPER ՀԿ–ն, Իզմիրլյան հիմնադրամը, Ռազմավարական զարգացման գործակալություն (ՌԶԳ) ՀԿ–ն և «Վանանդ Ագրո» ՓԲԸ–ն:

Ծրագիրն իրականացնող գործընկերներն են Գերմանական միջազգային համագործակցության ընկերությունը (GIZ) և HEKS/EPER ՀԿ–ն՝ ՌԶԳ–ի և Բեռնի Կիրառական գիտությունների համալսարանի (HAFL) գյուղատնտեսական, անտառային և պարենային գիտությունների դպրոցի ներգրավմամբ։

«Հայաստանի կենդանի լանդշաֆտները շուկայի զարգացման համար» (LILA) ծրագրի շրջանակում ապրիլի 15-18-ը Վայոց Ձորի Արենի համայնքում տեղի ունեցավ «Սեդրակ Մամուլյանի խոհարարական գիտելիքները» խորագրով տեսական և գործնական դասընթաց՝ նախատեսված Լեռնային Ղարաբաղից բռնի տեղահանված անձանց համար։

Քառօրյա դասընթացին «Հայ խոհարարական ավանդույթների զարգացման և պահպանման» ՀԿ նախագահ Սեդրակ Մամուլյանը մասնակիցներին ներկայացրեց ազգային խոհանոցի ծագումնաբանությունը և մշակութային առանձնահատկությունները, խոհարարական հիմունքները, ինչպես նաև ազգային ճաշատեսակների պատրաստման համար կիրառվող համեմունքների ճանաչելիությունը և օգտագործման կարգը՝ առանձնակի կարևորություն տալով սննդի անվտանգությանը։

Տեսական գիտելիքներին հետևեց գործնական մասը, որի ժամանակ մասնակիցները՝ Սեդրակ Մամուլյանի և նրա օգնական Անյուտա Մաթևոսյանի ուղղորդմամբ պատրաստեցին ազգային խոհանոցի հայնտի ճաշատեսակներ։

Դասընթացը մասնակիցներին հնարավորություն ընձեռեց ծանոթանալ ազգային ճաշատեսակների պատրաստման ճիշտ տեխնիկային, տեխնոլոգիական գործընթացների վերահսկմանը, ինչպես նաև նպաստեց խոհարարական գիտելիքների, հմտությունների և կարողությունների զարգացմանը՝ գաստրոզբոսաշրջության ոլորտում հետագայում ընդգրկվելու համար։

Դասընթացի ավարտին մասնակիցներին հանձնվեցին հավաստագրեր։

ԼԻԼԱ ծրագիրը ֆինանսավորվում է Շվեյցարիայի զարգացման և համագործակցության գործակալության (SDC) կողմից և իրականացվում Բնության համաշխարհային հիմնադրամի հայաստանյան մասնաճյուղի կողմից (WWF-Հայաստան)՝ «Ռազմավարական զարգացման գործակալություն» (ՌԶԳ) ՀԿ-ի հետ համատեղ: