Ծնունդով Սյունիքի մարզի Կապան քաղաքից Ռիմա Հարությունյանը դեռ մանկուց երազում էր բժիշկ դառնալ, սակայն ճակատագրի հեգնանքով դարձավ հմուտ անասնաբույժ։ 

Դեռ մանկուց երազում էի բժիշկ դառնալ և կյանքեր փրկել։ Դպրոցն ավարտելուց հետո փորձեցի ընդունվել Երևանի պետական բժշկական համալսարան, սակայն բալերս չբավարարեցին և պետք է արագ ընտրություն կատարեի։ Որոշեցի ընդունվել Երևանի անասնաբուծական-անասնաբուժական ինստիտուտի նախապատրաստական կուրս՝ 2-րդ կամ 3-րդ կուրսից Բժշկական համալսարան տեղափոխվելու ակնկալիքով։ Սակայն հակառակ սպասելիքների՝ մնացի այդ նույն համալսարանում վեց տարի։

Բարձր առաջադիմությամբ պայմանավորված 2-րդ կուրսում ինձ հնարավորություն ընձեռվեց տեղափոխվել այլ ուսումնական հաստատություն, սակայն անասնաբուծական-անասնաբուժական ինստիտուտի կողմից կազմակերպված պրակտիկաներն այնքան հետաքրքիր էին, որ ես որոշեցի մնալ նույն ինստիտուտում՝ շարունակել կրթությունս և դառնալ անասնաբույժ։

Ավարտելուց հետո աշխատանքի ընդունվեցի Կապանի կենդանիների սերմնավորման կայանում, որպես անասնաբույժ և սերմնավորող-տեխնիկ։ Արդեն մեկ տարի անց նույն հաստատությունում սկսեցի աշխատել, որպես համաճարակաբան։ Որոշ ժամանակ անց ընդունվեցի «ՎաՄաքս» ընկերություն, որպես ֆերմայի գլխավոր անասնաբույժ և աշխատեցի այնտեղ 10 տարի։

Բավականաչափ բարդ, բայց վերջում շատ շնորհակալ աշխատանք է։

Մարդկանց պարագայում բժշկական օգնություն տրամադրելը հեշտ է, ինչը չենք կարող ասել կենդանիների դեպքում, անասնաբույժների աշխատանքն ավելի բարդ է: Կենդանիների պարագայում բժշկական օգնություն տրամադրելը ավելի դժվար է, քանի որ կենդանիները չեն խոսում և չեն բարձրաձայնում իրենց ցավերի մասին, և նույնիսկ նրանց տերերն էլ շատ հաճախ չգիտեն, թե ինչումն է խնդիրը:

Ես, ով ժամանակին երազում էի բժիշկ դառնալ, դարձա սիրելի և հարգված անասնաբույժ։ Ոլորտում 40 տարի աշխատելով և բուժելով անթիվ կենդանիների՝ հիմնել եմ իմ սեփական անասնաբուժական կենտրոնը, աշխատում եմ «Գյուղատնտեսական ծառայությունների կենտրոն» ՊՈԱԿ-ում և շարունակում եմ անասնաբուժական ծառայություն մատուցել Կապանի տարածաշրջանի գյուղական բնակավայրերում։ Երբեք չեմ զղջացել անասնաբույժ դառնալու և երիտասարդությանս լավագույն տարիներն այս մասնագիտությանը նվիրելու համար։

Ալեքսանը Շիրակի մարզում, գյուղատնտեսական կենդանիների անասնաբուժությամբ և բուծման աշխատանքներով զբաղվող երիտասարդ մասնագետ է։ Անասնաբուժություն մասնագիտության նկատմամբ հետաքրքրությունը սկսվել է դեռ մանկուց, այս մասնագիտությունն իրեն է անցել սերնդեսերունդ՝ հորից որդուն։

Ալեքսանը հստակ գիտեր, որ ցանկանում է անասնաբույժ դառնալ, այդ իսկ պատճառով դպրոցն ավարտելուց հետո 2012 թվականին նա ընդունվեց Ստեփանավանի գյուղատնտեսական քոլեջ՝ Անասնաբուժության բաժինը։

Ուսումնառությանը զուգահեռ սկսել է զբաղվել կենդանիների որոշ հիվանդությունների ախտորոշման, բուժման և կանխարգելման աշխատանքներով։ Այս ընթացքում, բացի մասնավոր անասնաբուժական ծառայություններից, մատուցել է նաև պետական պատվերի շրջանակում իրականացվող գյուղ կենդանիների կանխարգելիչ պատվաստումներ և այլ միջոցառումներ։

Որպես աշխատասեր և իր գիտելիքներն ու կարողությունները մշտապես բարելավելու ցանկություն ունեցող անձնավորություն, Ալեքսանը որոշեց ձեռք բերել բարձրագույն կրթություն և արդեն 2016 թվականին ընդունվեց Հայաստանի ազգային ագրարային համալսարանի անասնաբուժական բժշկագիտության և անասնաբուծության ֆակուլտետ, ընտրելով սանփորձագետի մասնագիտացումը։

Ալեքսանը սկսել է համագործակցությունը «Ռազմավարական զարգացման գործակալություն» ՀԿ-ի հետ 2020 թվականից։ Տարիների ընթացքում նա մասնակցել է բազմաթիվ վերապատրաստումների, դասընթացների ու փորձի փոխանակման այցերի, որոնք ըստ նրա նպաստել են իր մասնագիտական կարողությունների աճին։

Ալեքսանն արդեն երկար տարիներ անասնաբուժական ծառայություն էր մատուցում Շիրակի մարզի 5-ից ավել բնակավայրերում, երբ 2022թվ-ին ֆերմերների հորդորով որոշում կայացրեց մասնագիտանալ նաև ԽԵԿ-ի արհեստական սերմնավորում կատարելու գործում։

2023 թվականի փետրվար ամսին մասնակցելով կովերի սերմնավորման վերաբերյալ տեսական և գործնական դասընթացներին, ինչպես նաև տեխնիկական աջակցություն ստանալուց հետո սկսել է իր համայնքում մատուցել ԱՍ ծառայություն։ 2023 թվականի առաջին կիսամյակում սերմնավորել է 320 կով, որոնք եղել են 110 ֆերմերի կենդանիներ։ Հաջորդ տարի պլանավորում է այս արդյունքը առնվազն կրկնապատկել։

Աշխատասիրության արդյունքում հասել է նրան, որ իր կողմից մատուցվող անասնաբուժական և արհեստական սերմնավորման  ծառայություններից օգտվում են ոչ միայն Ազատան բնակավայրի, այլև հարևան Բենյամին, Արևիկ, Այգաբաց, Բայանդուր և նույնիսկ Մարալիկ բնակավայրերի ֆերմերները։

Ալեքսանը նշում է, որ մասնագիտական հաջողությունների հասել է ջանասիրաբար աշխատելու և գիտելիքներն ու մասնագիտական կարողություններն անընդհատ բարելավելու արդյունքում։ Նշում է, որ հպարտությամբ է կրում անասնաբույժի մասնագիտությունը, որով ապահովում է իր ընտանիքի բարեկեցությունն ու երեխաների ապագան։