2026 թ. փետրվարի 19-ին IADAAM ծրագրի շրջանակում իրականացվել է համատեղ դաշտային այց՝ Եվրոպական միության պատվիրակության ծրագրի ղեկավար Սուսանա Մարտինսի, Ֆրանսիական զարգացման գործակալության (AFD)՝ Հայաստանում ծրագրի ղեկավար Օդրի Գուրդիենի, ինչպես նաև IADAAM ծրագրի թիմի մասնակցությամբ։
Դաշտային այցի հիմնական նպատակն էր գնահատել, թե ինչպես են ծրագրի ռազմավարական ուղղությունները վերածվում շոշափելի և չափելի արդյունքների՝ գյուղաջակցության խորհրդատվական ծառայությունների կարողությունների զարգացման, ցուցադրական ֆերմաների միջոցով գործնական գիտելիքի փոխանցման խթանման և ջրային ռեսուրսների կառավարման արդյունավետության ու կայունության բարձրացման միջոցով։ Այս բաղադրիչները հանդիսանում են գյուղատնտեսական ոլորտի մրցունակության և դիմակայունության ամրապնդման առանցքային նախադրյալներ՝ նպաստելով նորարարությունների ներդրմանը և համակարգային բարեփոխումների առաջմղմանը։
Համատեղ այցը վերահաստատեց գործընկերների միասնական հանձնառությունը՝ ապահովելու ինստիտուցիոնալ կարողությունների ամրապնդում և ռեսուրսների պատասխանատու կառավարում՝ ձևավորելով երկարաժամկետ և կայուն ազդեցություն Հայաստանի գյուղատնտեսության և ջրային ոլորտներում։
«Հայաստան – Ոռոգվող գյուղատնտեսության զարգացումը Արարատի և Արմավիրի մարզերում» (IADAAM) ծրագիրը, որը ֆինանսավորվում է Եվրոպական միության կողմից (ԵՄ) և իրականացվում Զարգացման ֆրանսիական գործակալության (ԶՖԳ) աջակցությամբ, նպատակ ունի վերափոխել ոռոգվող գյուղատնտեսությունը Հայաստանում։
ՀՀ էկոնոմիկայի նախարարության կողմից իրականացվող ծրագրի տեխնիկական աջակցության բաղադրիչն իրականացվում է «Ագրո քընսալթինգ Եվրոփ»-ի, «Ավենյու քընսալթինգ գրուպ»-ի, «Ռազմավարական զարգացման գործակալություն» ՀԿ-ի և «3 ԱՐ Ստրատեգիա» ՍՊԸ մասնակցությամբ կոնսորցիումի կողմից՝ գյուղատնտեսական քաղաքականության ամրապնդման և ոլորտային բարեփոխումների առաջխաղացման նպատակով: