Ամփոփելով COP17 Armenia համաժողովը՝ կարևոր է անդրադառնալ ձեռք բերված փորձին, հաստատված նոր կապերին, բովանդակալից քննարկումներին և կայուն զարգացմանն ուղղված ծրագրերի ներկայացման հնարավորություններին:
«Ռազմավարական զարգացման գործակալություն» (ՌԶԳ) ՀԿ-ի համար COP17-ը կարևոր առիթ էր ևս մեկ անգամ ընդգծելու մեր գործունեության առանցքում գտնվող սկզբունքները՝ բնապահպանական առաջնահերթությունների և տնտեսական զարգացման համադրումը, համայնքների ներուժի բացահայտումն ու զարգացումը, ինչպես նաև առավել կանաչ և դիմակայուն ապագայի ձևավորմանն ուղղված նախաձեռնությունների խթանումը։
Համաժողովի ընթացքում ՌԶԳ-ն ներկայացրեց իր ծրագրերը, կուտակած փորձն ու գործընկերային համագործակցությունները՝ ցույց տալով, թե ինչպես են կայուն զարգացման գաղափարները վերածվում կոնկրետ գործողությունների և շոշափելի արդյունքների։
LILA ծրագրի շրջանակում աջակցել ենք բնության պահպանության, կայուն զբոսաշրջության և բնական պաշարների պատասխանատու օգտագործման սկզբունքների համադրմանը՝ միաժամանակ նպաստելով գյուղական համայնքների տնտեսական հնարավորությունների ընդլայնմանն ու բնակչության կենսամակարդակի բարելավմանը։
ՄԱՎԵՏԱ ծրագրի շրջանակում նպաստում ենք գյուղատնտեսական կրթության արդիականացմանը՝ ամրապնդելով մասնագիտական ուսումնական հաստատությունների և գործատուների համագործակցությունը, զարգացնելով աշխատաշուկայի պահանջներին համապատասխան մասնագիտական կարողություններ և խթանելով կանաչ հմտությունների ձևավորումը։
INLIMA ծրագրի շրջանակում աջակցում ենք անասնապահության ոլորտում կայուն գործելակերպերի ներդրմանը, անասունների սեզոնային նախրաքաշի երթուղիների վերականգնմանն ու արոտավայրերի արդյունավետ կառավարմանը։ Այս աշխատանքը միտված է բնական էկոհամակարգերի վրա ճնշման նվազեցմանը, լանդշաֆտների պահպանությանն ու գյուղական համայնքների դիմակայունության ամրապնդմանը։
RECONOMY ծրագրի շրջանակում խթանում ենք թվային փոխակերպումն ու ներառական կանաչ լուծումների զարգացումը՝ նպաստելով բիզնեսների և համայնքների մրցունակության բարձրացմանը, ռեսուրսների արդյունավետ օգտագործմանն ու կայուն տնտեսական զարգացմանը։
IADAAM ծրագրի շրջանակում աջակցում ենք Արարատի և Արմավիրի մարզերում ոռոգվող գյուղատնտեսության զարգացմանը՝ խթանելով ջրային ռեսուրսների արդյունավետ կառավարումը, կլիմայական փոփոխությունների նկատմամբ դիմակայուն գյուղատնտեսական գործելակերպերի ներդրումն ու գյուղատնտեսական գործունեության և բնական լանդշաֆտների պահպանության միջև հավասարակշռության ապահովումը։
Մեր ծրագրերն արտացոլում են մի կարևոր համոզմունք. կայուն զարգացումը մեկ առանձին ոլորտի խնդիր չէ։ Այն ներառում է ջրային և հողային ռեսուրսների պատասխանատու կառավարում, կենսաբազմազանության պահպանում, մասնագիտական կրթության զարգացում, բիզնեսի աջակցություն և մարդկանց համար նոր տնտեսական հնարավորությունների ստեղծում։ Այս բոլոր ուղղությունները փոխկապակցված են և միասին են ձևավորում երկարաժամկետ ու կայուն զարգացման հիմքերը։
COP17-ը ևս մեկ անգամ ընդգծեց, որ իրական և երկարաժամկետ փոփոխությունների հասնելու համար անհրաժեշտ է համադրել գլոբալ նպատակներն ու տեղական փորձը, համագործակցությունը վերածել գործնական նախաձեռնությունների և զարգացման գործընթացներում առանցքային դեր հատկացնել համայնքներին։
ՌԶԳ-ն շարունակելու է իր գործունեությունը՝ համագործակցելով համայնքների, պետական կառույցների, մասնավոր հատվածի և միջազգային գործընկերների հետ՝ համատեղ ջանքերով կյանքի կոչելու կայուն զարգացման նախաձեռնություններ և նպաստելու Հայաստանի ավելի կանաչ, դիմակայուն ու բարեկեցիկ ապագայի կերտմանը։
Համաժողովն ավարտվում է, իսկ կայուն ապագայի կերտմանն ուղղված աշխատանքը շարունակվում: