ՄԱՎԵՏԱ ծրագրի շրջանակում Արարատի, Արմավիրի, Կոտայքի և Գեղարքունիքի մարզերում շարունակվում են մասնավոր հատված-ՄԿՈւ համագործակցության ամրապնդմանն ուղղված քայլերը։

Արարատի տարածաշրջանային պետական քոլեջի, Արմավիրի տարածաշրջանային պետական քոլեջի, Կոտայքի տարածաշրջանային պետական քոլեջի և Գավառի պետական գյուղատնտեսական քոլեջի նախաձեռնությամբ իրականացվեցին հանդիպումներ տվյալ տարածաշրջաններում գործող մասնավոր հատվածի ներկայացուցիչների հետ՝ նպատակ ունենալով ձևավորել համագործակցության նոր հարթակներ և նախապատրաստվել դուալ կրթության ներդրման գործընթացին։

Սեպտեմբերից վերոնշյալ քոլեջներում նախատեսվում է ներդնել դուալ ուսուցմամբ մի շարք մասնագիտություններ, այդ թվում՝ 

• սառնարանային տնտեսություն
• կաթիլային համակարգերի մոնտաժում և շահագործում
• ջերմատնային տնտեսություն
• անասնաբուժություն

Հանդիպումների ընթացքում ներկայացվեցին դուալ կրթության մոդելի առանձնահատկությունները, նախատեսվող մասնագիտությունները, ինչպես նաև կրթական հաստատությունների և գործատուների միջև համագործակցության պայմանագրերի հիմնական դրույթները։ 

️Քննարկվեցին նաև մասնավոր հատվածի ներգրավվածության հնարավոր ձևաչափերը՝ ուսանողների գործնական ուսուցման, մասնագիտական հմտությունների զարգացման և աշխատաշուկայի պահանջներին համապատասխան կարողությունների ձևավորման ուղղությամբ։

Հանդիպումների արդյունքում ձեռք բերվեց նախնական պայմանավորվածություն շարունակելու համագործակցության մասին քննարկումները և առաջիկայում կնքելու համագործակցության համաձայնագրեր։ Մասնավոր հատվածի ներկայացուցիչները նաև հայտնեցին պատրաստակամություն ակտիվորեն ներգրավվելու դուալ կրթության իրականացման գործընթացում՝ նպաստելով կրթության և աշխատաշուկայի միջև կապի առավել արդյունավետ ձևավորմանը։

ՄԱՎԵՏԱ ծրագիրը ֆինանսավորվում է Շվեյցարիայի զարգացման և համագործակցության գործակալության (SDC), Գերմանիայի տնտեսական համագործակցության և զարգացման նախարարության (BMZ), Ավստրիական զարգացման գործակալության (ADA) և Հայաստանի կառավարության կողմից։

Ծրագիրն իրականացնող գործընկերներն են Գերմանական միջազգային համագործակցության ընկերությունը (GIZ), Ռազմավարական զարգացման գործակալությունը և Բեռնի կիրառական գիտությունների համալսարանի (HAFL) գյուղատնտեսական, անտառային և պարենային գիտությունների դպրոցը:

RECONOMY-ի «Ոլորտների թվայնացում հանուն մրցունակության» ծրագրի աջակցությամբ իրականացված «Ստարտափների աջակցման մեխանիզմների մշակում» հետազոտության արդյունքները ներկայացվեցին մայիսի 22-ին Երևանում ԱՏՁՄ-ի (UATE) կողմից կազմակերպված փորձագիտական աշխատանքային հանդիպման ընթացքում։

Հայաստանի ստարտափային էկոհամակարգի զարգացումը այսօր պահանջում է ոչ միայն նոր գաղափարներ, այլև համակարգային քաղաքական լուծումներ, որոնք կօգնեն նորարարական բիզնեսներին հաղթահարել աճի հիմնական խոչընդոտները։ Մասնավորապես, ֆինանսավորման սահմանափակ հասանելիությունը, միջազգային շուկաներին ինտեգրման դժվարությունները և վաղ փուլում աջակցող գործիքների պակասը շարունակում են ազդել ոլորտի մրցունակության վրա։

Քննարկումների ընթացքում ներկայացված հետազոտական արդյունքները կարևոր հնարավորություն էին գնահատելու, թե ինչպիսի քաղաքական և ֆինանսական մեխանիզմներ կարող են իրական ազդեցություն ունենալ Հայաստանի ստարտափ միջավայրի վրա։ Առանձնահատուկ ուշադրություն դարձվեց միջազգային փորձի տեղայնացմանը՝ հասկանալու համար, թե որ մոդելներն են առավել կիրառելի հայկական շուկայի պայմաններում և ինչպես կարելի է ձևավորել ավելի ճկուն ու արդյունավետ աջակցման համակարգ։

RECONOMY-ի «Ոլորտների թվայնացում հանուն մրցունակության» ծրագրի տեսանկյունից նման քննարկումները կարևոր են հատկապես այն պատճառով, որ թվայնացումը և նորարարությունը այլևս միայն տեխնոլոգիական ուղղություններ չեն․ դրանք տնտեսական մրցունակության, աշխատաշուկայի զարգացման և տարածաշրջանային համագործակցության առանցքային գործոններ են։ Ուժեղ ստարտափային միջավայրը կարող է դառնալ նոր աշխատատեղերի, ներդրումների և տեխնոլոգիական լուծումների ձևավորման կարևոր շարժիչ ուժ։

Հանդիպումը ևս մեկ անգամ վերահաստատեց պետական կառույցների, մասնավոր հատվածի, զարգացման ծրագրերի, քաղաքականություն մշակողների և ոլորտային փորձագետների միջև շարունակական երկխոսության և համագործակցության կարևորությունը։

RECONOMY ծրագիրը շարունակելու է աջակցել այն նախաձեռնություններին, որոնք նպաստում են մրցունակ տնտեսության, թվային փոխակերպման և նորարարական ձեռնարկատիրական էկոհամակարգերի զարգացմանը Հայաստանում և տարածաշրջանում։

RECONOMY Շվեդիայի միջազգային զարգացման համագործակցության գործակալության (Sida) ներառական և կանաչ տնտեսական զարգացման ծրագիր է, որն իրականացվում է Helvetas-ի կողմից՝ համագործակցելով «Ռազմավարական զարգացման գործակալություն» ՀԿ-ի և Արևելյան գործընկերության և Արևմտյան Բալկանյան երկրների այլ կազմակերպությունների հետ։