«Փախստականների սոցիալ-տնտեսական ինտեգրումը Հայաստանում» (SEIRA) ծրագիրը շարունակում է նպաստել Հայաստանում փախստականների և խոցելի հյուրընկալող համայնքների կայուն սոցիալ-տնտեսական ինտեգրմանն ու դիմակայունության ամրապնդմանը։
Ծրագիրն իրականացվում է «Ռազմավարական զարգացման գործակալություն» (ՌԶԳ) ՀԿ-ի և ՄԱԿ-ի Պարենի համաշխարհային ծրագրի (ՊՀԾ) համագործակցությամբ։ Եռամյա ծրագիրը նպաստում է կենսապահովման հնարավորությունների դիվերսիֆիկացմանը, գյուղատնտեսական դիմակայունության բարձրացմանը և ներառական տնտեսական զարգացմանը՝ Գեղարքունիքի, Վայոց ձորի և Սյունիքի մարզերում։
Թիրախային աջակցություն տրամադրելով փոքր ֆերմերներին, տեղական ձեռնարկություններին և խոցելի տնային տնտեսություններին՝ ծրագիրը նպատակ ունի ամրապնդել երկարաժամկետ ինքնաբավությունը և համայնքային համախմբվածությունը։
SEIRA ծրագրի շրջանակում արձանագրված առաջընթացին ծանոթանալու և շահառուների հետ անմիջական շփում ունենալու նպատակով մայիսի 11-12-ը Հայաստանում Շվեյցարիայի փոխդեսպան, Շվեյցարիայի զարգացման և համագործակցության գործակալության (SDC) տարածաշրջանային տնօրենի տեղակալ Ուրսուլա Լաուբլիի գլխավորած պատվիրակությունը՝ ՌԶԳ-ի և ՊՀԾ-ի ներկայացուցիչների ուղեկցությամբ, իրականացրել է համատեղ դաշտային այց Գեղարքունիքի և Սյունիքի մարզեր։
Այցի ընթացքում պատվիրակությունը հանդիպել է անասնաբուծությամբ, հատապտղային մշակությամբ, հացաբուլկեղենի արտադրությամբ, կերարտադրությամբ և այլ եկամուտ ստեղծող գյուղատնտեսական գործունեություններով զբաղվող շահառուների հետ։ Քննարկումների ընթացքում ընդգծվել է ծրագրի ներդրումը պարենային անվտանգության ամրապնդման, կենսապահովման հնարավորությունների ընդլայնման և ինչպես փախստական, այնպես էլ հյուրընկալող համայնքների երկարաժամկետ դիմակայունության բարձրացման գործում։
Կենսապահովման հնարավորությունների զարգացման, տեղական կարողությունների ամրապնդման և երկարաժամկետ զարգացման հեռանկարների ստեղծման միջոցով SEIRA ծրագիրը նպաստում է առավել դիմակայուն և ներառական համայնքների ձևավորմանը Հայաստանում՝ որտեղ վերականգնումը վերածվում է կայուն զարգացման և համատեղ առաջընթացի։
SEIRA ծրագիրը ֆինանսավորվում է Շվեյցարիայի զարգացման և համագործակցության գործակալության կողմից և իրականացվում է «Ռազմավարական զարգացման գործակալություն» ՀԿ-ի և ՄԱԿ-ի Պարենի համաշխարհային ծրագրի կողմից։