Հայաստանից և Մոլդովայից գործընկեր տուրօպերատորները, RECONOMY ծրագրի «Ոլորտների թվայնացում հանուն մրցունակության» ծրագրի աջակցությամբ, մասնակցեցին ITB Berlin 2026 միջազգային զբոսաշրջային ցուցահանդեսին՝ ներկայացնելով Հայաստանի, Վրաստանի և Մոլդովայի միջև միջսահմանային զբոսաշրջային առաջարկներ։
Աշխարհի առաջատար զբոսաշրջային ցուցահանդեսներից մեկում նրանց մասնակցությունը կարևոր հնարավորություն էր ներկայացնելու տարածաշրջանային զբոսաշրջային երթուղիների զարգացման աճող ներուժը, որոնք կապում են տարբեր երկրներ, մշակույթներ և համայնքներ։
Ներկայացված առաջարկները զբոսաշրջիկներին հնարավորություն են տալիս բացահայտելու տարածաշրջանի մշակութային հարուստ ժառանգությունը, խոհարարական ավանդույթներն ու բազմազան բնական լանդշաֆտները, միաժամանակ նպաստելով տեղական զբոսաշրջային բիզնեսների և համայնքների զարգացմանը։
Թվային կարողությունների զարգացման, միջազգային տեսանելիության բարձրացման և շուկաների հասանելիության ընդլայնման միջոցով ծրագիրն աջակցում է զբոսաշրջային ծառայություններ մատուցող կազմակերպություններին՝ առավել արդյունավետ ներկայացնելու իրենց առաջարկները միջազգային շուկաներում և ներգրավելու նոր այցելուներ։
Տարածաշրջանային համագործակցությունը, նորարարական մոտեցումները և թվայնացումը նոր հնարավորություններ են ստեղծում տարածաշրջանում կայուն զբոսաշրջության զարգացման համար։
RECONOMY-ն Շվեդիայի միջազգային զարգացման համագործակցության գործակալության (Sida) ներառական և կանաչ տնտեսական զարգացման ծրագիր է, որն իրականացվում է Helvetas-ի կողմից՝ համագործակցելով «Ռազմավարական զարգացման գործակալություն» ՀԿ-ի և Արևելյան գործընկերության և Արևմտյան Բալկանյան երկրների այլ կազմակերպությունների հետ։