INLIMA ծրագրի շրջանակում 2026թ. մայիսի 2-9-ը Բավարիա (Գերմանիա) է իրականացվել ուսումնաճանաչողական այց՝ Հայաստանի տոհմային տավարաբուծության ոլորտի շահագրգիռ կողմերի մասնակցությամբ։ Ծրագրի նպատակն էր խթանել մասնագիտական փորձի փոխանակումը, զարգացնել ոլորտային կարողությունները և ներկայացնել տոհմային տավարաբուծության, վերարտադրողական տեխնոլոգիաների ու գյուղատնտեսական կրթության ոլորտներում կիրառվող առաջատար եվրոպական փորձը։
Ուսումնական այցի շրջանակում մասնակիցները ծանոթացել են Բավարիայի տոհմային տավարաբուծության կազմակերպման մոդելներին, ժամանակակից ֆերմերային տնտեսությունների կառավարման մեխանիզմներին, կենդանիների առողջության պահպանման, կերակրման և արտադրողականության բարձրացման գործնական մոտեցումներին։
Թրիսդորֆի գյուղատնտեսական կրթական կենտրոնում և Վայհենշտեֆան-Թրիսդորֆ կիրառական գիտությունների համալսարանում անցկացվել են տեսական և գործնական դասընթացներ՝ նվիրված կաթնատու կենդանիների բուծման, կերաբաժինների կազմման, կենդանիների տարբեր սեռահասակային խմբերի կառավարման և անասնաբուծության ժամանակակից մեթոդներին։
Այցի կարևոր բաղադրիչներից էր BVN տոհմային տավարաբուծության արհեստական սերմնավորման ասոցիացիա և Minitube GmbH ընկերություն այցելությունները, որոնց ընթացքում ներկայացվել են ցլերի սերմնահեղուկի արտադրության, վերարտադրողական տեխնոլոգիաների, սերմնահեղուկի գնահատման, խորը սառեցման և լոգիստիկ համակարգերի ժամանակակից լուծումները։
Ծրագրի շրջանակում պատվիրակությունն այցելել է նաև վերարտադրողական տեխնոլոգիաների ոլորտում միջազգային առաջատար Minitube GmbH ընկերություն, որտեղ ներկայացվել են արհեստական սերմնավորման արտադրական գործընթացները, սերմնահեղուկի վերլուծության և կրիոպահպանման տեխնոլոգիաները, որակի վերահսկման մեխանիզմները և միջազգային արտահանման ու լոգիստիկայի համակարգերը։
Այցեր են իրականացվել նաև Bayern Genetik GmbH, ASR Bayern և Բավարիայի Պետական Գրուբի ուսումնական ֆերմա, որտեղ մասնակիցները ծանոթացել են գենետիկ ծրագրերին, ցեղերի ընտրության ռազմավարություններին, գենոմային գնահատման համակարգերին և տոհմաբուծության զարգացման ժամանակակից միտումներին։ Բարձր արտադրողականությամբ և արոտային կառավարման համակարգերով ֆերմաներում ներկայացվել են արդյունավետ հոտի կառավարման և կայուն անասնաբուծության գործնական օրինակներ։
Ուսումնաճանաչողական այցի ընթացքում մասնակիցները ձեռք են բերել մասնագիտական նոր գիտելիքներ և գործնական փորձ՝ ուղղված տոհմային տավարաբուծության զարգացմանը, ժամանակակից մոտեցումների կիրառմանը և ոլորտում մասնագիտական կարողությունների ամրապնդմանը։
«Նորարարական անասնապահություն․ կենդանիների նախրաքարշ, բուծում և շուկաներ» (INLIMA) ծրագիրն իրականացվում է «Ռազմավարական զարգացման գործակալություն» ՀԿ-ի կողմից՝ Ավստրիական զարգացման և համագործակցության ծրագրային միավոր Ավստրիայի զարգացման գործակալության ֆինանսավորմամբ: