2025թ. հոկտեմբերի 17-ին Ֆրանսիական զարգացման գործակալության (AFD), ՀՀ Էկոնոմիկայի նախարարության Ծրագրերի իրականացման թիմի (PIT) և IADAAM ծրագրի ներկայացուցիչները իրականացրեցին համատեղ դաշտային այց Արարատի մարզ՝ IADAAM ծրագրի թիրախային տարածք և Հայաստանի ամենաարդյունավետ գյուղատնտեսական շրջաններից մեկը։
Այցի նպատակն էր տեղում գնահատել ծրագրի հիմնական ուղղություններով արձանագրված առաջընթացը և ներկայացնել, թե ինչպես են նորարարական լուծումները, գործընկերային համագործակցությունը և գործնական նախաձեռնությունները միավորվում՝ խթանելու ոռոգման համակարգերի արդիականացումը ու գյուղաջակցության խորհրդատվական ծառայությունների արդյունավետ զարգացումը։
Դաշտային այցը մեկնարկեց Ավշարի Գյուղատնտեսական խորհրդատվական ծառայության գրասենյակից, որտեղ պատվիրակությունը ծանոթացավ գյուղատնտեսական խորհրդատվական ծառայությունների թվայնացման գործընթացին և հանդիպեց Վեդիի, Արտաշատի և Արմավիրի Գյուղաջակցության խորհրդատվական ծառայության թիմերին (AEST)։ Վերջիններս հանդիսանում են այն օղակը, որը կապում է նորարարությունը ֆերմերների առօրյա կարիքների հետ։ Քննարկումները կենտրոնացած էին այն ուղղությունների վրա, թե ինչպես են թվային գործիքներն ու համակարգված խորհրդատվական գործունեությունը նպաստում ֆերմերների գիտելիքների ընդլայնմանը, ագրոտեխնիկական հմտությունների կատարելագործմանը և դիմակայունության բարձրացմանը։
Այնուհետև պատվիրակությունն այցելեց հնարավոր ցուցադրական ֆերմաներ՝ ծանոթանալու դրանց ընտրության հիմնավորումներին և նախատեսվող ցուցադրական թեմաներին։ Այցի ընթացքում ֆերմերների և խորհրդատվական թիմերի հետ քննարկվեցին կարողությունների զարգացման, համաֆինանսավորման և իրագործման այն մեխանիզմները, որոնք նորարարական լուծումները կբերեն ավելի մոտ դաշտային պրակտիկային։
Արտաշատի խորհրդատվական գրասենյակում քննարկումները նվիրված էին համայնքների հետ համագործակցության ամրապնդմանը՝ անդրադառնալով այն ձևաչափերին, որոնց միջոցով գյուղատնտեսական խորհրդատուները համագործակցում են համայնքային դերակատարների հետ՝ ապահովելով, որ ժամանակակից ոռոգման և գյուղատնտեսական տեխնոլոգիաները հասնեն համայնքային մակարդակ՝ այնտեղ, որտեղ ձևավորվում է իրական արդյունքը։
Դաշտային այցը եզրափակվեց Վեդիի ջրամբարում, որտեղ թիմը ծանոթացավ ենթակառուցվածքային համակարգերի, ջրային կառավարման մեխանիզմների և դաշտային ցանցի գործունեությանը։ Ջրային կառավարման մարմինների հետ քննարկվեցին ռազմավարական քայլեր՝ ուղղված ջրամբարի շահագործման մեկնարկի և ծրագրի ավարտի միջև ընկած ժամանակային բացի արդյունավետ լրացմանը՝ ապահովելով ծրագրի շարունակականությունը և երկարաժամկետ կայունությունը։
Այս համատեղ դաշտային այցը վերահաստատեց Ֆրանսիական զարգացման գործակալության, Էկոնոմիկայի նախարարության Ծրագրերի իրականացման և IADAAM ծրագրի թիմերի համատեղ հանձնառությունը՝ նպաստելու դիմակայուն, արդյունավետ և ներառական ոռոգման համակարգերի ձևավորմանն Արարատի մարզում։
Նորարարության, գործընկերության և մարդակենտրոն մոտեցման միջոցով ծրագիրը շարունակաբար ամրապնդում է Հայաստանի ոռոգվող գյուղատնտեսության հիմքերը՝ դաշտ առ դաշտ, ֆերմեր առ ֆերմեր և համայնք առ համայնք։
«Հայաստան – Ոռոգվող գյուղատնտեսության զարգացումը Արարատի և Արմավիրի մարզերում» (IADAAM) ծրագիրը, որը ֆինանսավորվում է Եվրոպական միության կողմից (ԵՄ) և իրականացվում Զարգացման ֆրանսիական գործակալության (ԶՖԳ) աջակցությամբ, նպատակ ունի վերափոխել ոռոգվող գյուղատնտեսությունը Հայաստանում։
ՀՀ էկոնոմիկայի նախարարության կողմից իրականացվող ծրագրի տեխնիկական աջակցության բաղադրիչն իրականացվում է «Ագրո քընսալթինգ Եվրոփ»-ի, «Ավենյու քընսալթինգ գրուպ»-ի, «Ռազմավարական զարգացման գործակալություն» ՀԿ-ի և «3 ԱՐ Ստրատեգիա» ՍՊԸ մասնակցությամբ կոնսորցիումի կողմից՝ գյուղատնտեսական քաղաքականության ամրապնդման և ոլորտային բարեփոխումների առաջխաղացման նպատակով։