2021 թ. փետրվարի 22-24-ին «Հմտությունների և գիտելիքի զարգացում» պիլոտային ծրագրի շրջանակներում Հայաստան են այցելել Helvetas շվեյցարական փոխգործակցության ներկայացուցիչները: Նրանց այցի հիմնական նպատակն էր հանդիպել ՌԶԳ ՀԿ-ի աշխատակիցներին ու ծրագրի գործընկերներին և քննարկել առկա իրավիճակն ու զբոսաշրջության և գյուղատնտեսության ոլորտներում առկա բացերը:
Եռօրյա պաշտոնական այցի շրջանակներում Հարավային Կովկասի նախագծերի տարածաշրջանային ղեկավար Ալեքսանդր Գոգոբերիձեն և Արևմտյան Բալկանների տարածաշրջանային ղեկավար Լեա Շլակուն հանդիպումներ ունեցան Հայաստանի ազգային ագրարային համալսարանի (ՀԱԱՀ) ռեկտոր պրն. Վարդան Ուռուտյանի, Զբաղվածության պետական գործակալության ղեկավար պրն. Արտակ Սիմոնյանի և «Պրոֆեսիոնալ զբոսավարների հայկական ասոցիացիա» հասարակական կազմակերպության նախագահ պրն. Յաշա Սոլոմոնյանի և այլոց հետ: Հանդիպումների ընթացքում նրանք խոսեցին զբոսաշրջության և գյուղատնտեսության հնարավորությունների ու մարտահրավերների մասին և քննարկեցին «Հմտությունների և գիտելիքի զարգացում» ծրագրի հետ համագործակցության շրջանակներում նախատեսվող նախաձեռնությունները:
Helvetas շվեյցարական փոխգործակցության ներկայացուցիչները նշեցին, որ հանդիպումները բովանդակալից և արդյունավետ էին և իրենց երախտագիտությունը հայտնեցին հայկական հյուրընկալության համար:
