Նոյեմբերի 12-ին Վայոց ձորում և 14-ին Սյունիքում, «Կենսաբազմազանություն և կայուն տեղական զարգացում Հայաստանում» ծրագրի «Կենսաբազմազանության և պահպանվող տարածքներ» բաղադրիչի շրջանակում, տեղի ունեցան երկու կարևոր խորհրդակցական աշխատաժողովներ՝ նվիրված «Ջերմուկ» և «Տաթև» ազգային պարկերի ստեղծման գործընթացներին։
Աշխատաժողովների ընթացքում քննարկվեցին ազգային պարկերի սահմանների ձևավորման սկզբունքները, կառավարման ապագա մոտեցումները, ինչպես նաև համայնքների հետ համատեղ տնտեսական և զբոսաշրջային համագործակցության հնարավորությունները։
Ռազմավարական զարգացման գործակալություն ՀԿ-ն ներկայացրեց ԼԻԼԱ ծրագրի տնտեսական բաղադրիչի շրջանակում համայնքներում իրականացված զբոսաշրջության և հյուրընկալության ոլորտի մատակարարման արժեշղթայի զարգացման հաջողված փորձը։ ԼԻԼԱ ծրագրի արդյունքները վկայում են, որ պատասխանատու զբոսաշրջության խթանումը, համայնքային ներուժի ներգրավումը և բնապահպանական արժեքների պահպանության ինտեգրված մոտեցումը կարող են միաժամանակ ապահովել ինչպես պահպանվող տարածքների արդյունավետ կառավարում, այնպես էլ տեղական տնտեսության կայուն աճ։
Վստահ ենք, որ ներկայացված լավագույն փորձն ու աշխատաժողովներում ծավալված քննարկումները կնպաստեն նոր ստեղծվող ազգային պարկերի կայուն և արդյունավետ կառավարման համակարգերի ձևավորմանը, համայնքային մասնակցության ամրապնդմանը և համատեղ զարգացման նախաձեռնությունների իրականացմանը։
ՌԶԳ ՀԿ-ն շարունակում է աջակցել այն գործընթացներին, որոնք միտված են համայնքների տնտեսական զարգացմանը, բնապահպանական արժեքների պահպանությանը և պատասխանատու զբոսաշրջության խթանմանը։
«Հայաստանի կենդանի լանդշաֆտները շուկայի զարգացման համար» (ԼԻԼԱ) ծրագիրը ֆինանսավորվում է Շվեյցարիայի զարգացման և համագործակցության գործակալության (SDC) կողմից և իրականացվում է Բնության համաշխարհային հիմնադրամի հայաստանյան մասնաճյուղի (WWF-Հայաստան) և «Ռազմավարական զարգացման գործակալություն» (ՌԶԳ) ՀԿ-ի համատեղ ջանքերով։