Դեկտեմբերի 4-ին Սեդրակ Մամուլյանի խոհարարական ստուդիայում տեղի ունեցավ Տուրիզմի հայկական ֆեդերացիայի կողմից Ամադեուս ամրագրման համակարգի ուսուցման կարճաժամկետ դասընթացի մասնակիցների հավաստագրերի հանձնման արարողությունը։
Դասընթացին մեթոդական և տեխնիկական աջակցություն է տրամադրվել RECONOMY-ի «Ոլորտների թվայնացում հանուն մրցունակության» ծրագրի կողմից։
Դասընթացի առաջին շրջանավարտներին ողջունեցին և աշխատանքային հաջողություններ մաղթեցին «Ոլորտների թվայնացում հանուն մրցունակության» ծրագրի ղեկավար Մհեր Սահակյանը և Տուրիզմի հայկական ֆեդերացիայի նախագահ Մեխակ Ապրեսյանը։
Այնուհետև շրջանավարտները զբոսաշրջության ոլորտում ազգային խոհանոցի դերի կարևորության շուրջ զրույց-քննարկում ունեցան «Հայ խոհարարական ավանդույթների զարգացման և պահպանման» ՀԿ նախագահ Սեդրակ Մամուլյանի հետ, վայելեցին ավանդական ուտեստներ։
Հիշեցնենք, որ Ամադեուս ամրագրման համակարգում աշխատելու գիտելիք և կարողություն ունեցող մասնագետները հնարավորություն կունենան աշխատել զբոսաշրջության ոլորտում համապատասխան գործունեություն իրականացնող կազմակերպություններում։
