Անի Սուքիասյանը ծնվել է 2002 թվ․-ին Լոռվա մարզի Տաշիր քաղաքում։ Չնայած երիտասարդ տարիքին արդեն մի քանի տարի է աշխատում է «Լոռվա կաթ» ընկերությունում։
1998 թվ․ ծնողներս հիմնել էին փոքրիկ կաթնամթերքի արտադրամաս, որը իրենց քրտնաջան աշխատանքի շնորհիվ այսօր դարձավ Տաշիրում հայտնի կաթնամթերք արտադրող ընկերություններից մեկը։
Ամբողջ կյանքս՝ մանկությունս ու պատանեկությունս անցել է այդ արտադրամասում։ Դպրոցն ավարտելուց հետո առանց վարանելու որոշում կայացրեցի ընդունվել Ստեփանավանի պրոֆեսոր Ա. Քալանթարի անվան պետական գյուղատնտեսական քոլեջ՝ կաթի և կաթնամթերքի տեխնոլոգիա բաժին։
2019 թվ․-ին, լինելով դեռ ուսանող մասնակցեցի Վրաստանում կայացած երիտասարդ տեխնոլոգների մրցույթին և պատրաստածս պանրի շնորհիվ գրավեցի առաջին պատվավոր հորիզոնականը։
Երեք տարի և վեց ամիս քոլեջում սովորելուց հետո ընդունվեցի ՀԱԱՀ-ի Պարենամթերքի տեխնոլոգիաների ֆակուլտետը և սկսեցի աշխատել ծնողներիս կողմից հիմնած պանրի և կաթնամթերքի արտադրամասում։
Ինձ վստահվեց նաև լինել պրակտիկայի ղեկավար և կազմակերպել Ստեփանավանի պետական գյուղատնտեսական քոլեջի կաթի և կաթնամթերքի տեխնոլոգիա բաժնում սովորող ուսանողների 2021-2022 ուսումնական տարվա պրակտիկան։
Տեխնոլոգիաների զարգացումն ու աշխատանքների մեքենայացումն այլևս ֆիզիկական ուժ չի պահանջում․ այսօր կարևոր դեր է խաղում կրթությունն ու գիտական մեթոդների ներդրումը։ Ցանկանում եմ նշել, որ մասնագիտություն ընտրելիս մի մտածեք՝ արդյոք ձեր ընտրած մասնագիտությունը տղամարդու, թե կնոջ մասնագիտություն է։ Առաջնորդվեք Ձեր նախասիրությունների բնույթով։
Կաթնամթերքը կարևոր դեր է խաղում մադու սննդակարգում, այն համարվում է անփոխարինելի և ունի բացառիկ նշանակություն երեխաների սննդի մեջ, հատկապես նրանց կյանքի սկզբնական շրջանում:
Դեռ մանկուց մի երազանք ունեմ, որը ամեն գնով կփորձեմ իրականացնել՝ դա Հայաստանում մանկական կաթնախառնուրդի և պաղպաղակի արտադրությունն է։ Կաթնախառնուրդ արտադրելու համար անհրաժեշտ է մեծ ծավալներով կաթ հավաքագրել, որն այս պայմաններում հնարավոր չէ, սակայն ես հուսով եմ, որ մի օր կիրականացնեմ երազանքս և կհիմնեմ գործարան, որը կդառնա արժանի մրցակից ներկրվող տեսականուն։
Երազանքս իրականացնելու ուղին արդեն սկսել եմ, այս տարի ծնողներիս օգնությամբ նախաձեռնել եմ պաղպաղակի արտադրամասի հիմնումը, որը հուսով եմ շուտով իր արտադրանքով կուրախացնի Լոռու մարզի մանուկներին։