Հիրիքնազ Էգնատոսյանն երկար տարիներ աշխատել է, որպես Ամասիա համայնքի Գտաշեն բնակավայրի անասնաբույժ։ Նա արդեն երկար տարիներ նաև զբաղվում է անասնապահությամբ։
Անասնաբուժությունը կենդանասերների համար ամենացանկալի մասնագիտությունն է, և շատ երեխաներ սկսում են նշել իրենց հետաքրքրությունն այս մասնագիտության նկատմամբ դեռ շատ վաղ տարիքից:
Ես դեռ մանկուց շատ էի սիրում կենդանիների հետ խաղալ, նրանց խնամել, և արդեն դպրոցական տարիներին սիրեցի նաև կենսաբանություն և քիմիա առարկաները։ Երբ պետք էր մասնագիտության հարցում որոշում կայացնեի հասկացա, որ ցանկանում եմ դառնալ անասնաբույժ։ Ծնողներս հետաքրքրվեցին և իմացան, որ գյուղաբնակների համար կա հնարավորություն ուղեգրով ընդունվել Երևանի անասնաբուծական-անասնաբուժական ինստիտուտ՝ ավարտելուց հետո մարզ վերադառնալու և Ամասիայում, որպես անասնաբույժ աշխատելու պայմանով։
Այս միտքն ինձ շատ ոգևորեց, մտածեցի լավ հնարավորություն է երազանքս իրականացնել, բարձրագույն կրթություն ստանալ, աշխատանքով ապահովված լինել և մնալ հենց այն նույն վայրում, որտեղ ծնվել ու մեծացել եմ։
Սովորելու համար Երևան տեղափոխվեցի, այստեղ հանդիպեցի նաև ապագա ամուսնուս, ով եկել էր Վրաստանից Հայաստան՝ անասնաբուժություն ուսանելու։
Քանի որ երկուսս էլ սիրում էինք այս մասնագիտությունը, մենք մեծ սիրով և ոգևորությամբ մասնակցում էինք թե տեսական և թե գործնական դասերին։ Ավարտելուց հետո բնակություն հաստատեցինք Ամասիայի Գտաշեն գյուղում և երկուսս էլ ապահովվեցինք աշխատանքով, ես սկսեցի աշխատել, որպես Գտաշենի տեղամասային անասնաբուծական-անասնաբուժական կայանի վարիչ, իսկ ամուսինս՝ անասնաբույժ։
Անասնաբույժի մասնագիտությունը շատ հետաքրքիր է։ Եթե սիրեք Ձեր մասնագիտությունը հաստատ կհաջողեք։ Ձեր կյանքի գործը պետք է Ձեզ ուրախություն, բավարարվածություն պատճառի և բարձրացնի Ձեր ինքնագնահատականը:
Արդեն շուրջ 30 տարի է, ես ու ամուսինս աշխատում ենք, որպես անասնաբույժ, սպասարկելով երկու գյուղ՝ Գտաշենն ու Կամխուտը։ Ունենք շուրջօրյա անասնաբուժական կետ-դեղատուն։
Ուրախ եմ, որ ժամանակին ճիշտ որոշում եմ կայացրել մասնագիտության ընտրության հարցում և եթե նորից ընտրության հնարավորություն ունենայի, կնտրեի նույն մասնագիտությունը։
Անասնաբուժությունը շատ կարևոր մասնագիտություն է մարդկության առողջապահության պահպանման տեսանկյունից։ Մենք՝ անասնաբույժներս, հաճախ ենք ասում, որ բժիշկը բուժում է մարդուն, իսկ անասնաբույժը՝ մարդկությանը։ Շատերը չգիտեն, որ կան զոոնոզ հիվանդություններ, որոնք մարդուն փոխանցվում են կենդանու միջոցով և եթե մենք չբուժենք կենդանիներին կամ չկանխարգելենք նրանց մոտ հիվանդությունների տարածումը, մարդկանց մոտ հիվանդությունների, համաճարակների քանակը մի քանի անգամ ավելի բարձր կլինի։
Ես հպարտ եմ, որ երկար տարիներ աշխատելով, որպես անասնաբույժ օգնել եմ բազում ֆերմերի, խորհուրդներ տվել, ինչպես ճիշտ խնամել կենդանիներին կամ արագ արձագանքել հիվանդություններին մինչ անասնաբույժների օգնության հասնելը։